Një studim i ri ka hedhur dritë mbi një temë që zakonisht konsiderohet tabu: sa shpesh njerëzit nxjerrin gazra. Shkencëtarë nga University of Maryland kanë zhvilluar të ashtuquajturat “të brendshme inteligjente”, një pajisje e vogël që regjistron në mënyrë objektive çdo episod flatulence. Rezultatet kanë befasuar edhe vetë studiuesit: njerëzit nxjerrin gazra mesatarisht 32 herë në ditë, më shumë se dyfishi i normës prej 14 herësh që mjekët e konsideronin më parë si “normale”.
Studimi zbuloi gjithashtu dallime të mëdha mes individëve. Në njërin ekstrem janë “prodhuesit e lartë të hidrogjenit”, persona që nxjerrin 40–50 herë gazra në ditë për shkak të mikrobiomës së tyre të veçantë. Në anën tjetër janë të ashtuquajturit “Zen Digesters”, të cilët, edhe pse konsumojnë sasi të mëdha fibrash (25–38 gramë në ditë), mund të kenë vetëm rreth katër episode në ditë.
Pajisja funksionon përmes një sensori elektrokimik që mat hidrogjenin dhe gazra të tjerë. Meqë hidrogjeni prodhohet vetëm nga mikrobet e zorrëve, kjo teknologji jep një pasqyrë të drejtpërdrejtë dhe në kohë reale të aktivitetit të mikrobiomës. Kjo është veçanërisht e rëndësishme sepse deri tani mjekët nuk kishin një “bazë normale” për prodhimin e gazrave, ndryshe nga tregues si rrahjet e zemrës apo niveli i glukozës.
Sipas autorit kryesor, Dr Brantley Hall, matja objektive rrit ndjeshëm saktësinë shkencore dhe ndihmon mjekët të kuptojnë kur prodhimi i gazrave është realisht i tepruar. Pajisja u vlerësua si e rehatshme nga mbi 80 %e pjesëmarrësve.
Tani ekipi po zgjeron kërkimin në një program kombëtar të quajtur Human Flatus Atlas, me synimin për të krijuar bazat shkencore që do të ndihmojnë në vlerësimin e dietave, probiotikëve dhe ndërhyrjeve të tjera që ndikojnë në shëndetin e zorrëve.
