Autoritetet në Tajvan kanë lëshuar një urdhër aktiv arresti ndaj CEO-s dhe bashkëthemeluesit të OnePlus, Pete Lau, duke e akuzuar kompaninë për rekrutim të paligjshëm inxhinierësh. Sipas një raportimi të Bloomberg, urdhri është nxjerrë nga prokurorët e distriktit Shilin, të cilët pretendojnë se OnePlus dhe kompania motër Oppo kanë shkelur ligjet tajvaneze që rregullojnë punësimin dhe transferimin e talentit drejt Kinës kontinentale.
Pete Lau, i cili mban njëkohësisht pozicionin e CEO-s së OnePlus dhe të Chief Product Officer në Oppo, akuzohet se që nga viti 2014 ka qenë i përfshirë në rekrutimin e më shumë se 70 inxhinierëve nga Tajvani për të punuar në Kinë. Para lëshimit të urdhrit të arrestit ndaj tij, autoritetet tajvaneze kanë paditur dy shtetas vendas që dyshohet se kanë vepruar si ndërmjetës ose bashkëpunëtorë në këtë proces. Sipas qeverisë së Tajvanit, këto veprime janë pjesë e një përpjekjeje më të gjerë për “rrëmbimin e talenteve”, një fenomen që shihet si kërcënim për sigurinë ekonomike dhe teknologjike të vendit.
Rasti lidhet me shkeljen e ligjit të njohur si “Act Governing Relations Betëeen the People of the Taiëan Area and the Mainland Area”, i cili kërkon miratim shtetëror për punësimin e profesionistëve vendas nga kompani me bazë ose aktivitet kryesor në Kinë. Edhe pse Kina dhe Tajvani ndajnë gjuhë të përbashkët dhe afërsi gjeografike, kufizimet ligjore janë vendosur pikërisht për të frenuar largimin masiv të ekspertizës teknologjike.
Ky nuk është rasti i parë i këtij lloji. Më herët, Tajvani ka tentuar të arrestojë edhe drejtues të kompanisë Luxshare Precision Industry, e cila prodhon komponentë për iPhone. Ndërkohë, OnePlus ka deklaruar se aktiviteti i saj vazhdon normalisht, ndërsa autoritetet tajvaneze nuk kanë dhënë ende një reagim zyrtar.
