Apple solli një revolucion më 2017 me iPhone X, duke prezantuar ekranin “full screen” me notch dhe duke hequr butonin fizik, në nder të 10-vjetorit të iPhone. Tani, sipas një raporti të Bloomberg, kompania po përgatitet për një tjetër ridizenjim madhor me rastin e 20-vjetorit të iPhone, që do të vijë në vitin 2027.
Modeli i ri, i quajtur iPhone 20, do të ketë xham të harkuar në të gjitha anët, duke reflektuar filozofinë e re të dizajnit të iOS, të njohur si “Liquid Glass”. Ky ndryshim pritet të theksojë ndjesinë vizuale të rrjedhshmërisë dhe elegancës, duke e diferencuar iPhone-in nga gjeneratat e mëparshme me linja më të mprehta.
Megjithatë, përpara këtij momenti historik, Apple planifikon një tjetër hap të madh: prezantimin e iPhone-it të parë të palosshëm në vitin 2026. Bloomberg raporton se Apple po punon për të ndryshuar teknologjinë e ekranit të këtij modeli, me qëllim të fshehë më mirë palosjen – një prej sfidave kryesore të telefonëve foldable që ofrojnë rivalët Android.
Kështu, kompania duket se po ndjek një plan të qartë zhvillimi: fillimisht futja e një modeli të palosshëm për të hyrë në tregun gjithnjë e më popullor të pajisjeve të palosshme, e më pas një dizajn krejtësisht i ri për 20-vjetorin që do të shënojë një etapë të veçantë për markën.
Nëse këto plane realizohen, vitet 2026 dhe 2027 do të jenë periudha më transformuese për iPhone që nga debutimi i tij origjinal në 2007.
