Në rolin e tij të ri si CEO i Relativity Space, ish-shefi i Google, Eric Schmidt, po eksploron një ide ambicioze: vendosjen e qendrave të të dhënave në hapësirë. Kjo ide buron nga rritja e shpejtë e kërkesës për energji që po shkakton inteligjenca artificiale (AI).
Gjatë një dëgjese në Kongresin amerikan, Schmidt paralajmëroi se disa qendra të dhënash të gjeneratës së re mund të kërkojnë deri në 10 gigavat energji – dhjetëfishin e një termocentrali bërthamor mesatar. Ai parashikoi se vetëm në SHBA do të duhen edhe 29 gigavat shtesë në pak vite, dhe deri në 67 gigavat të tjerë deri në vitin 2030.
Për të përballuar këtë krizë energjie, Schmidt po shqyrton mundësinë e vendosjes së qendrave të të dhënave në hapësirë dhe përdorimit të energjisë diellore orbitale. Për këtë arsye, ai bleu kompaninë Relativity Space, e cila është e specializuar në teknologjinë e prodhimit me printim 3D dhe po zhvillon raketën Terran R, një raketë e fuqishme, e pjesërisht e ripërdorshme, që mund të transportojë deri në 33,500 kg ngarkesë në orbitën e ulët të Tokës.
Qëllimi i Schmidt është të përdorë këtë teknologji për të kapërcyer kufizimet e infrastrukturës energjetike në Tokë. Në krahasim me SpaceX apo Blue Origin, Relativity Space është më e pavarur politikisht, gjë që i jep atij më shumë liri veprimi.
Megjithatë, koncepti i qendrave të të dhënave në orbitë përballet me sfida të mëdha. Edhe pse teknikisht i mundshëm, ai mund të rezultojë ekonomikisht i paqëndrueshëm ose i parealizueshëm me teknologjinë aktuale të raketave. Dhe nëse entuziazmi për AI bie, edhe kriza energjetike që po krijohet mund të zhduket po aq shpejt.
