Isomorphic Labs, start-upi katërvjeçar i zbulimit të ilaçeve të reja në pronësi të Alphabet (kompania mëmë e Google), do të nisë testimin e një ilaçi të dizenjuar nga inteligjenca artificiale në fund të këtij viti, thotë themeluesi Sir Demis Hassabis.
“Ne po shikojmë onkologjinë, sëmundjet kardiovaskulare, neurodegjenerimin, të gjitha fushat e mëdha të sëmundjeve dhe mendoj se deri në fund të këtij viti, ne do të kemi ilaçin tonë të parë,” tha ai në një intervistë për Financial Times në World Economic Forum. “Zakonisht duhen mesatarisht pesë deri në 10 vjet [për të zbuluar] një ilaç. Dhe ndoshta ne mund ta përshpejtojmë atë 10 herë, gjë që do të ishte një revolucion i jashtëzakonshëm në shëndetin e njeriut”, tha Hassabis, i cili mori çmimin Nobel me kolegun e tij John Jumper dhe biokimistin David Baker në tetor.
Isomorphic u nda nga krahu i kërkimit të AI të Google, Google DeepMind në vitin 2021, por mbetet një degë në pronësi të plotë të kompanisë së saj mëmë, Alphabet. Potenciali i start-up-it ka tërhequr partnerë të mëdhenj farmaceutikë, të cilët janë të prirur për të ulur shpenzimet dhe për të rritur efikasitetin e procesit të kushtueshëm të zhvillimit të barnave. Hassabis i tha më parë FT-së se ekipi i tij po punonte në gjashtë programe të zhvillimit të ilaçeve me Eli Lilly dhe Novartis.
Në një intervistë të gjerë, Hassabis, gjithashtu bëri thirrje për më shumë kujdes dhe koordinim midis zhvilluesve kryesorë të AI që konkurrojnë për të ndërtuar inteligjencën e përgjithshme artificiale. Ai paralajmëroi se teknologjia mund të kërcënojë qytetërimin njerëzor nëse del jashtë kontrollit ose ripërdoret nga “aktorë të këqij”…për qëllime të dëmshme”.
Qëllimi përfundimtar i Google DeepMind është të krijojë inteligjencën e përgjithshme artificiale, ose “një sistem që është i aftë të shfaqë të gjitha aftësitë njohëse që kanë njerëzit“, sipas Hassabis, i cili tha se pavarësisht raportimeve të mediave sociale se është shumë pranë, AGI e vërtetë ishte ende 5 deri në 10 vjet larg.
