Një grup prej më shumë se 200 muzikantësh të profilit të lartë kanë nënshkruar një letër të hapur duke bërë thirrje për mbrojtje kundër përdorimit shfrytëzues të inteligjencës artificiale që imiton zërin e artistëve njerëzorë.
Nënshkruesit përfshijnë zhanre dhe epoka të ndryshme muzikore, duke filluar nga yjet si Billie Eilish, J Balvin dhe Nicki Minaj te Stevie Wonder dhe REM. Letra, e cila u lëshua nga grupi mbrojtës i Aleancës për të Drejtat e Artistëve, bën kërkesën e gjerë që kompanitë e teknologjisë të zotohen të mos zhvillojnë mjete të AI që minojnë ose zëvendësojnë kantautorët dhe artistët njerëzorë.
“Ky sulm ndaj krijimtarisë njerëzore duhet të ndalet. Ne duhet të mbrohemi nga përdorimi grabitqar i AI për të vjedhur zërat dhe ngjashmëritë e artistëve profesionistë, për të shkelur të drejtat e krijuesve dhe për të shkatërruar ekosistemin muzikor”, thuhet në letër. Letra nuk bën thirrje për një ndalim të plotë të përdorimit të AI në muzikë ose prodhim, duke thënë se përdorimi i përgjegjshëm i teknologjisë mund të ketë përfitime për industrinë.
Prodhuesit e muzikës kanë përdorur mjete të inteligjencës artificiale në mënyra të ndryshme vitet e fundit, në një rast duke përdorur AI për të izoluar vokalin e John Lennon nga një këngë e vjetër demo dhe për t’i përdorur ato për të krijuar një këngë “të re” të Beatles e cila u publikua vitin e kaluar.
Letra e Aleancës për të Drejtat e Artistëve është pjesë e një reagimi të gjerë të industrisë nga artistët dhe krijuesit kundër përdorimit të inteligjencës artificiale gjeneruese, pasi teknologjia vazhdon të paraqesë çështje etike dhe ligjore që lidhen me shkeljen e të drejtave të autorit dhe të drejtat e punës.
Përhapja e imazheve pornografike të Taylor Swift të krijuara nga AI gjithashtu tërhoqën vëmendje shtesë ndaj përdorimit me qëllim të keq të “deepfakes” dhe në fillim të këtij viti i shtyu ligjvënësit të prezantojnë një projekt-ligj që synon kriminalizimin e imazheve seksuale jokonsensuale, të krijuara nga AI.
