Geek Room së bashku me Neptun do të jetë prezent në një ndër eventet më të mëdha të teknologjisë për smartphone, Mobile World Congress 2024 gjatë datave 27-28-29 shkurt në Barcelonë. Më poshtë ne do të flasim për disa nga produktet që pritet të prezantohen gjatë MWC 2024 nga kompanitë kryesore që do të marrin pjesë.
Honor
Kompania ka konfirmuar se do të prezantojë serinë e saj të ardhshme të smartphone-ve flagship, serinë Magic 6, si dhe Magic V2 në këtë ngjarje. Eventi me titullin “Discover the Magic” tregon se telefoni inteligjent i ardhshëm Magic 6 do të vijë me një sistem të ri kamerash “Falcon” dhe një bateri të re silikon-karbon.
Honor Magic 6 Pro ka debutuar tashmë në Kinë, por nëpërmjet MWC do të bëhet lançimi në tregun global të kësaj serie.
Xiaomi
Raportime të ndryshme sugjerojnë se kompania do të prezantojë globalisht Xiaomi 14 dhe Xiaomi 14 Pro, së bashku me Xiaomi 14 Ultra. Në website-in e kompanisë përmendet bashkëpunimi me Leica, pra presim disa zhvillime të reja në sistemin e kamerave. Të gjitha pajisjet në serinë Xiaomi 14 pritet të fuqizohen nga Snapdragon 8 Gen 3 me HyperOS të bazuar në Android 14.
Xiaomi ka shpërndarë gjithashtu dhe një reklamim “Human x Car x Home” për MWC, që do të thotë se ne mund të shohim më shumë sesa thjesht telefona inteligjentë nga marka, ndoshta duke përfshirë një orë të re inteligjente si dhe makinën e parë elektrike të kompanisë.
Samsung
Dhe pse kompania sapo ka prezantuar serinë më të re të smartphone-ve flagship, Galaxy S24, mund të ketë ende disa surpriza për klientët e saj besnik. Pamjet e para të Galaxy Ring u prezantuan shumë shkurtimisht gjatë eventit Unpacked dhe ne nuk besojmë se produkti është gati për t’u prezantuar gjatë MWC, megjithatë mbetet për t’u parë.
Nothing
Nothing ka konfirmuar se smartphone-i i ardhshëm do të quhet Phone (2a). Sidoqoftë, eventi i prezantimit të tij do të jetë pas MWC, më 5 mars. Raportimet sugjerojnë se Nothing Phone (2a) do të jetë një pajisje e midrange, e fuqizuar nga çipi MediaTek Dimensity 7200 dhe me sistem operativ Android 14. Thuhet se do të ketë një ekran 6.7 inç HD+ me refresh rate 120 Hz dhe një konfigurim me kamerë të dyfishtë në pjesën e prapme. Do të duhet të presim dhe të shohim nëse kompania do të zbulojë më shumë rreth pajisjes më vonë gjatë këtij muaji.
OnePlus
OnePlus sapo prezantoi OnePlus 12 dhe OnePlus 12R, por duket se kompania ka akoma më shumë produkte për ne. Me shumë mundësi gjatë MWC 2024 do të prezantohet gjenerata e re e OnePlus Watch 2. Ora inteligjente thuhet se ka një ekran rrethor AMOLED 1.43 inç dhe fuqizohet nga çipi Snapdragon W5 Gen 1. Për fat të mirë do të përdoret sistemi operativ Wear OS 4, dhe jo në një sistem operativ i personalizuar si ora inteligjente e gjeneratës së parë, duke i lejuar përdoruesit të instalojnë aplikacione nga Play Store.
Lenovo
Lenovo ka konfirmuar praninë e saj në MWC 2024. Raportimet sugjerojnë se kompania do të prezantojë një laptop transparent në këtë ngjarje. WindowsReport ndau imazhet e laptopit të përfolur, dhe ndërsa duket si një laptop i zakonshëm kur ndizet, ai shfaqet “transparent” kur ekrani është i fikur.
Motorola
Motorola mund të lançojë një telefon të ri të palosshëm të quajtur Motorola Glory në MWC 2024. MSPowerUser zbuloi specifikimet dhe paraqitjet e pajisjes muajin e kaluar, duke sugjeruar se pajisja do të jetë pasardhëse e Razr 40 Ultra ekzistuese.
Ndërsa zbulohet se telefoni inteligjent do të ketë një dizajn të ngjashëm me modelet ekzistuese Razr, telefoni thuhet se ka performancë më të mirë dhe jetëgjatësi më të mirë të baterisë falë një procesori të ri Qualcomm Snapdragon (modeli i panjohur ende).
