Pas pothuajse 3 vitesh përgatitje, një kompani e vogël e quajtur Rocket Lab tentoi të kapte një booster që bie drejt tokës duke përdorur një helikopter. Kjo teknikë e padëgjuar ndonjëherë më parë me sa duket është teknika më e sigurt dhe më efiçiente që kompania ka arritur të përdorë.
Qëllimi kryesor i kapjes në ajër i këtyre raketave është ripërdorimi (në mënyrë të ngjashme me SpaceX), duke ulur kështu kostot e prodhimit për secilin nga misionet e tyre. “Duke shpëtuar një booster të vetëm, ne kursejmë një sasi të madhe kohe, pasi nuk na duhet të prodhojmë një raketë tërësisht të re nga fillimi.” tha Peter Beck, CEO i Rocket Lab.
Kur raketat Electron lançohen në hapësirë, kompjuterët në bord bëjnë që ajo të rikthehet sërisht në atmosferën e Tokës. Sapo të arrijë lartësinë 13.3 kilometra, hapet një parashutë e cila ngadalëson shpejtësinë e rënies së raketës. Pikërisht në këtë moment vjen helikopteri dhe tenton të kapet në linjën e parashutës me një grep, duke shmangur kështu një përplasje në ujin e kripur të oqeanit.
Shumë pak pas lançimit në datën 2 maj, Electron riktheht në atmosferë dhe hap parashutat në mënyrë të njejtë si më parë. Më pas u shfaq helikopteri i kompanisë, që e kapi raketën për një moment të shkurtër. Megjithatë, piloti i helikopterit vuri re karakteristika të ndryshme të peshës, të cilat Rocket Lab nuk i kishte hasur më parë. Prandaj ai e gjykoi që vendimi më i mirë do të ishte lëshimi i raketës në oqean.
