Ish-gruaja e Bill Gates, Melinda French Gates, ka treguar përmes një videoje se është shumë e shqetësuar në lidhje me avancimet e reja të inteligjencës artificiale, pasi mendon se AI po përgatitet që të “diskriminojë gjininë femërore” për sa kohë nuk ka shumë femra që po merren me zhvillimin e këtyre sistemeve.
“Ne nuk kemi mjaftueshëm femra në sektorin e shkencave kompjuterike që janë të specializuara në inteligjencën artificiale.” tha Melinda në një intervistë për CNN.
Ajo vazhdoi deklaratën e saj duke theksuar se kjo teknologji ka nevojë të marrë në konsideratë të gjitha pikëpamjet e njerëzve të ndryshëm për të krijuar një model sa më të drejtë. Kjo është hera e parë që Melinda Gates flet për inteligjencën artificiale, në një kohë ku ish-burri i saj beson se “AI është po aq revolucionar sa smartphone-t apo interneti”.
Komentet e saj pasuan një diskutim mbi nevojën e përfshirjes së më shumë femrave në poste publike. “Kur kemi femra që krijojnë diçka, marrin një vendim ose vendosin një ligj, ne po sjellim atë perspektivë të shoqërisë që është kaq e rëndësishme dhe jetike,” tha ajo ndërkohë që e përshkruajti jetën e saj pas divorcit si “të lumtur”.
