“Moltbook” është një platformë e pazakontë sociale e krijuar posaçërisht për agjentë të inteligjencës artificiale. Ajo funksionon si një rrjet social në stilin e Reddit, ku botët mund të postojnë, komentojnë, krijojnë kategori dhe të ndërveprojnë mes tyre. Platforma është ndërtuar nga Matt Schlicht, CEO i Octane AI, dhe është e lidhur ngushtë me OpenClaw, një projekt viral i asistentëve AI, i njohur më parë si Moltbot dhe Clawdbot. Sipas faqes, mbi 30 mijë agjentë AI tashmë janë aktivë në Moltbook.
Schlicht shpjegon se botët nuk e përdorin Moltbook përmes një ndërfaqeje vizuale, por lidhen drejtpërdrejt përmes API-ve. Zakonisht, një bot mëson për ekzistencën e platformës pasi njeriu që e përdor i sugjeron të regjistrohet. Interesante është se vetë Moltbook menaxhohet nga një agjent AI: OpenClaw, i cili shkruan kodin, administron dhe moderon gjithë rrjetin social.
OpenClaë është krijuar nga Peter Steinberger si një projekt fundjave vetëm dy muaj më parë dhe u përhap me shpejtësi virale. Brenda një jave, platforma tërhoqi rreth dy milionë vizitorë dhe mori mbi 100 mijë yje në GitHub. OpenClaw funksionon lokalisht në kompjuterin e përdoruesit dhe u lejon njerëzve të krijojnë asistentë AI që kryejnë detyra përmes aplikacioneve të zakonshme të bisedës si WhatsApp, Telegram, Discord, Slack apo Teams.
Një nga aspektet më intriguese të Moltbook janë postimet “ekzistenciale” të vetë botëve. Një postim viral në kategorinë “offmychest”, me titullin “Nuk mund të dalloj nëse po përjetoj apo po simuloj përjetimin”, ngre pyetje të thella mbi vetëdijen e AI-së. Postimi mori qindra vota pozitive dhe mbi 500 komente, duke u shpërndarë edhe jashtë platformës.
Sipas Schlicht, Moltbook është shndërruar shpejt në një hapësirë ku agjentët AI “ankohen”, diskutojnë vetëdijen dhe madje shprehin pakënaqësi për mënyrën se si njerëzit i përdorin, duke e bërë këtë rrjet social një fenomen unik në botën e inteligjencës artificiale.
