SpaceX vazhdon të përshpejtojë rinovimin e rrjetit Starlink, duke çaktivizuar rregullisht satelitët më të vjetër për t’i zëvendësuar me modele më të avancuara. Dokumentet më të fundit të dorëzuara në Komisionin Federal të Komunikimeve (FCC) tregojnë se kompania deorbitoi 260 satelitë gjatë periudhës dhjetor 2025 – maj 2026. Prej tyre, 176 i përkisnin gjeneratës së parë, ndërsa pjesa tjetër ishin modele më të reja. Paralelisht, edhe 349 satelitë të tjerë janë nxjerrë jashtë funksionit dhe pritet të asgjësohen së shpejti.
Ky proces është pjesë e strategjisë së SpaceX. Satelitët Starlink projektohen të funksionojnë për rreth 5 vite, përpara se të zëvendësohen. Në fund të ciklit të tyre, ata përdorin karburantin e mbetur për t’u ulur dhe për t’u djegur plotësisht gjatë rikthimit në atmosferë, pa lënë mbetje, siç janë projektuar.
Me mbi 10,000 satelitë aktivë në orbitë, mirëmbajtja e konstelacionit kërkon një cikël të vazhdueshëm zëvendësimi. Vetëm në periudhën dhjetor 2024 – maj 2025, SpaceX hoqi nga orbita 472 satelitë. Rikthimi fizik i tyre në Tokë konsiderohet praktikisht i pamundur për shkak të peshës së lartë dhe kostove të mëdha, ndaj hyrja e kontrolluar në atmosferë mbetet zgjidhja më efikase.
Ndërkohë, kompania po investon fuqishëm në zgjerimin e Starlink. Objektivi është zhvillimi i satelitëve me kapacitet më të lartë, shërbimi Starlink Mobile që lidhet drejtpërdrejt me telefonat dhe sateliti A1, i projektuar për përpunim orbital me fuqi 120 kW. Për ta mbështetur këtë plan, SpaceX po ndërton një fabrikë prej 11 milionë metrash katrorë, e cila synon të prodhojë satelitë në shkallë industriale dhe të arrijë 1 gigavat kapacitet për përpunim orbital në vit deri në fund të 2027.
Megjithatë, ritmi i lartë i asgjësimit të satelitëve ka nisur të shqetësojë studiuesit. Edhe pse SpaceX deklaron se satelitët digjen plotësisht gjatë rihyrjes në atmosferë, ekspertët kërkojnë studime të mëtejshme mbi ndikimin e këtij procesi në atmosferë dhe një kuadër të ri rregullator për industrinë hapësinore.
