Qeveria e SHBA njoftoi të hënën se do të ofrojë një subvencion prej $6.4 miliardë për gjigantin e teknologjisë koreano-jugore Samsung për të ndërtuar fabrika të avancuara të prodhimit të çipave kompjuterikë në zonën e Austin. Vala më e re e financimit të qeverisë që synon të sjellë një rritje të prodhimit të çipave në Shtetet e Bashkuara.
Paratë vijnë si pjesë e një marrëveshjeje që do të bëjë që Samsung të investojë 40 miliardë nga paratë e veta për të përmirësuar një fabrikë që tashmë është në ndërtim e sipër në Taylor, Teksas. Përveç ndërtimit të një fabrike të dytë deri në fund të dekadës dhe shtimit të qendrave të reja të kërkimit dhe zhvillimit, Samsung do të ndërtojë gjithashtu një strukturë të avancuar – një fabrikë e specializuar që prodhon çipa të ndryshëm dhe komponentë elektronikë për t’i bërë ato gati për t’u integruar në makina, aeroplanë, telefona dhe mijëra makineri dhe pajisje të tjera.
Marrëveshja me Samsung vjen një javë pasi qeveria njoftoi një subvencion prej $6.6 miliardë për Taiwan Semiconductor Manufacturing Co., ose TSMC, për të zgjeruar operacionet e saj në Arizona. Pagesat janë pjesë e Aktit të CHIPS 2022, i cili ka si plan të ofrojë $39 miliardë subvencione për të inkurajuar kompanitë amerikane dhe të huaja për të prodhuar procesorë në Shtetet e Bashkuara.
Deri më tani, qeveria ka ndarë rreth $23 miliardë nga këto para për një pjesë të vogël të kompanive. “I gjithë zinxhiri i prodhimit, është i përqendruar në disa vende aziatike dhe kjo e lë zinxhirin e furnizimit të SHBA tepër të prekshëm ndaj ndërprerjeve. Kjo është e paqëndrueshme, “tha Sekretarja e Tregtisë Gina Raimondo në një deklaratë për gazetarët përpara njoftimit. “Tani po bëjmë këto investime që do t’i lejojnë Shtetet e Bashkuara të udhëheqin edhe një herë botën.”
