OpenAI ka prezantuar zyrtarisht produktin e parë fizik të kompanisë. Kompania pas ChatGPT ka prezantuar Codex Micro, një tastierë kompakte të programueshme e krijuar posaçërisht për të punuar me agjentin e saj të kodimit me inteligjencë artificiale, Codex.
Pajisja është zhvilluar në bashkëpunim me Work Louder, një kompani e njohur për tastierat dhe makro-pad të personalizuara. Me një çmim prej 230 dollarësh, Codex Micro nuk është një tastierë tradicionale, por një qendër kontrolli për zhvilluesit që përdorin AI në procesin e programimit.
Pajisja përfshin 13 butona mekanikë, një sensor me prekje, një dial rrotullues dhe një joystick, ndërsa ofrohet në versione me taste të zhurmshme ose të heshtura. Përdoruesit marrin gjithashtu 32 kapakë tastesh me ikona të Codex për të personalizuar komandat sipas nevojave të tyre.
Një nga veçoritë më interesante janë 6 tastet e ndriçuara, të cilat tregojnë statusin e agjentit AI me ngjyra të ndryshme. Për shembull, jeshilja sinjalizon një mesazh të ri, bluja tregon se AI është duke “menduar“, portokallia kërkon ndërhyrjen e përdoruesit, ndërsa e kuqja paralajmëron për një gabim.
Edhe joystick-u mund të programohet për të nisur procese si korrigjimi i gabimeve ose optimizimi i kodit, ndërsa dial lejon rregullimin e nivelit të arsyetimit që Codex përdor gjatë ekzekutimit të një detyre.
Megjithatë ky nuk është produkti që pritej prej kohësh nga entuziastët e teknologjisë. Sipas raportimeve të Bloomberg, kompania po zhvillon një asistent AI pa ekran, i aftë të kontrollojë pajisjet inteligjente të shtëpisë, të luajë muzikë dhe të komunikojë përmes ChatGPT. Projekti po realizohet në bashkëpunim me io Products, startup-in e themeluar nga ish-drejtuesi i dizajnit të Apple, Jony Ive, të cilin OpenAI e bleu vitin e kaluar për 6.5 miliardë dollarë.
