Kompania që themeloi ChatGPT, OpenAI, ka lajmëruar ditën e martë se do të ofrojë deri në $20,000 për përdoruesit që raportojnë pikat e dobëta të gjetura në sistemet e inteligjencës artificiale.
OpenAI Bug Bounty Program do të ofrojë një pagesë në bazë të rëndësisë së problemit të zbuluar, ku shpërblimi bazë do të nisë nga $200. Kjo është një teknikë që përdoret shpesh herë nga kompanitë teknologjike, të cilat inkurajojnë hakerat etikë dhe programuesit që të raportojnë problemet në sistemet e software-it.
Në detajet e përmendura në platformën Bugcrowd tregohet se OpenAI fton persona të ndryshëm që të rishikojnë funksione të caktuara në strukturën e ChatGPT dhe mënyrën se si sistemet e OpenAI komunikojnë dhe shpërndajnë të dhëna me aplikacione të palëve të treta.
Kjo lëvizje vjen vetëm disa ditë pasi Italia ndaloi përdorimin e ChatGPT për shkak të dyshimeve se shkelte rregullat e privatësisë, duke nxitur kështu dhe rregullatorë të tjerë evropianë që të studiojnë shërbimet AI akoma dhe më tepër.
ChatGPT u shndërrua në një fenomen global që nga lançimi i tij në nëntor, duke lehtësuar punën e shumë personave të ndryshëm.
