Ndryshe nga Facebook, popullariteti i TikTok u rrit menjëherë pasi ndërlidhi përdoruesit me interesat e tyre, dhe jo me miqtë në jetën reale apo familjarët. Në fakt, shumica e njerëzve nuk e pranojnë kërkesën e aplikacionit për t’u ndërlidhur me kontaktet e tyre, pasi për ta TikTok është një hapësirë ku nuk dëshirojnë të ndërveprojnë me njerëz që njohin.
Prandaj vitin e kaluar kompania mori vendimin që të zëvëndësonte seksionin mjaft të përdorur Discover me një tabelë të re “Friends” e cila nuk u prit mirë nga shumë përdorues. Tashmë duket se TikTok e ka kuptuar gabimin, dhe po mendon që të zhbëjë këtë ndryshim.
Kompania ka konfirmuar se ka nisur të testojë një shërbim të ri që do të zëvndësojë tabelën “Friends” me një eksperiencë të re që është më e ngjashme me faqjen Explore të Instagram. Nëse ky ndryshim do të vijë në versionin publik të aplikacionit, do të tregojë se kompania e pranon rolin e saj në ekosistem: TikTok është një platformë që përdoret për zbulimin e përmbajtjeve të reja dhe jo për ndërveprimin me miqtë në jetën reale.
Seksioni i ri Explore u zbulua për herë të parë nga Watchful.ai, e cila prezanton një ndërfaqje ku ju mund të eksploroni video në një format më të vogël. Nuk dihet ende se si do të funksionojnë rekomandimet në Explore apo se si do të lidhet në mënyrë direkte me interesat e përdoruesve.
