Kompania Quantix ka bërë të mundur përmes inteligjencës artificiale që ju të shndërroni regjistrimet e audiove në gjuhën shqipe në një tekst të shkruar, duke e transkriptuar atë automatikisht. Duket se transkriptimi është shumë i saktë, me saktësi deri në 90% të gjuhës standarde. Kompania tregon se një platformë e tillë mund të jetë shumë e përshtatshme për t’u përdorur në media apo dhe institucione shtetërore si përshembull në gjykata.
CEO Betim Drenica tregon se kjo është një arritje mjaft e madhe, duke patur parasysh se gjuha jonë flitet shumë më pak në botë krahasuar me vendet e tjera, si dhe investimi në teknologji nuk është ai i duhuri. Kompanisë iu është dashur të punojë në këtë projekt mbi 3 vite, dhe tashmë platforma Shqip.ai është në gjendje të transkriptojë një regjistrim 1 orë në 15 minuta. Megjithatë Drenica tregon se në të ardhmen pritet që koha të përmirësohet akoma dhe më tepër.
Përdoruesit do të mund ta aksesojnë këtë shërbim në web duke kërkuar shqip.ai, por për shkak të kërkesës së madhe duhet të aplikojnë për t’u pranuar në këtë shërbim.
Përdorimi do të jetë shumë i thjeshtë, mjafton të ngarkoni përmbajtjen e audios në web dhe për pak kohë do të keni gati një tekst të shkruajtur në mënyrë automatike. Gjithashtu përmes Shqip.ai do të keni mundësinë që të ktheni tekstin në audio apo të kontrolloni pikësimin.
