Netflix ka arritur marrëveshjen për blerjen e Warner Bros Discovery për $82.7 miliardë, një lëvizje që pritet të tronditë industrinë tradicionale të filmit dhe televizionit në Hollywood. Me këtë blerje, Netflix do të marrë kontrollin mbi asetet më të çmuara të WBD, duke përfshirë studion Warner Bros, shtëpinë e filmave të njohur si Harry Potter, Superman dhe Batman, si dhe HBO, të njohur për seriale të suksesshme si Game of Thrones, Succession dhe The White Lotus. Gjithashtu, Netflix siguron edhe arkiva të mëdha televizive, mes tyre Friends dhe The Big Bang Theory.
Marrëveshja pritet të mbyllet pasi WBD të shkëpusë nga struktura e saj kanalet kabllore si CNN, TBS dhe TNT. Megjithatë, Netflix do të marrë kontrollin e TNT Sports UK & Ireland, e cila transmeton Premier League, Champions League dhe ndeshje ndërkombëtare rugby.
Konkurrenca për blerjen ka qenë e fortë, me oferta nga Paramount-Skydance dhe Comcast. Netflix ka vendosur një tarifë prej $5.8 miliardë nëse marrëveshja dështon për arsye rregullatore, ndërsa WBD ka rënë dakord të paguajë $2.8 miliardë nëse e vonon marrëveshjen ose tërhiqet.
Megjithëse ky është një hap strategjik për të rritur katalogun dhe për të kursyer 2–3 miliardë dollarë në vit deri në vitin e tretë, analistët paralajmërojnë për shqetësime të mëdha rregullatore, pasi bashkimi i dy prej platformave më të mëdha streaming në SHBA mund të ndikojë ndjeshëm konkurrencën dhe çmimet për abonentët.
Netflix ka premtuar se Warner Bros do të vazhdojë me shpërndarje të gjera kinematografike, ndërsa angazhimet ekzistuese të WBD për filmat deri në fund të vitit 2029 duhet të respektohen. David Zaslav e cilësoi marrëveshjen si një mundësi për të vazhduar traditën shekullore të tregimit të historive, ndërsa kritikë si ish-shefi Jason Kilar paralajmëruan se kjo lëvizje ul dukshëm konkurrencën në Hollywood.
