Është përfolur prej kohësh se Meta po punon për të krijuar një palë syze inteligjente AR – dhe është e mundur që t’i shikojmë më vonë gjatë këtij viti.
Duke cituar burime të paidentifikuara të Meta, një raport i Business Insider pretendon se kompania planifikon të prezantojë një palë syze inteligjente “me teknologji AR të vërtetë” gjatë vjeshtës në Meta Connect. Syzet me emrin e koduar “Orion“, janë një produkt i ndryshëm nga syzet inteligjente Ray-Ban Meta të lançuara së fundmi dhe headset-i Meta Quest.
Syzet Ray-Ban Meta, ndërsa ofrojnë disa shërbime multimodale të AI dhe një kamera, nuk shtojnë asnjë element vizual AR. Ndërkohë, headset-i Meta Quest përdoren kryesisht për lojëra VR dhe një pjesë të vogël të përvojave të realitetit të përzier.
Me sa duket, ajo që i bën këto syze Orion pajisje AR “të vërteta” është fakti se ato supozohet të jenë më të avancuara teknologjikisht me një element vizual – rreth të cilit nuk ka shumë informacione. Raporti sugjeron se ka shumë presion të brendshëm në Meta për të pasur gati një produkt me cilësi të lartë gjatë këtij viti.
Megjithatë, dhe pse mund të shikojmë pamjen e parë të këtyre syzeve inteligjente gjatë Meta Connect në 2024, nuk duket se syzet Orion janë ende gati për një prodhim në masë. Syzet inteligjente janë planifikuar për t’u lançuar në treg në vitin 2027.
