Kia ndezi thashethemet për një rikthim të modelit Stinger këtë javë, pasi publikoi disa imazhe provokuese të një sedani të ri me profil fastback. Por kjo gjë nuk rezultoi e vërtetë pasi u prezantua koncepti i ri Vision Meta Turismo, qw nuk ka lidhje me një Stinger të ardhshëm, por është një projekt i zhvilluar për të festuar 80-vjetorin e kompanisë. Teknikisht, është 81-vjetori, pasi kompania e parë Kyungsung Precision Industry u themelua në vitin 1944, ndërsa emri Kia u shfaq në 1952 dhe makina e parë me katër rrota u prodhua vetëm në 1974. Deri atëherë, Kia prodhonte biçikleta, motoçikleta dhe kamionë.
Vision Meta Turismo paraqitet si një koncept futuristik me dizajn mjaft tërheqës, që sipas Kia-s reflekton “një epokë të re të mobilitetit” dhe merr frymëzim nga makinat GT të viteve ’60. Edhe pse nuk ka specifika teknike, është qartazi një automjet elektrik që premton “performancë dinamike”. Në pamjen e jashtme mund të dallohet lehtësisht dizajni me kënde të mprehta dhe drita të holla LED. Ndryshe nga ç’sugjeronin teaser-at, duket se nuk ka bagazh të hapshëm apo derë të pasme, gjë që vihet re shpesh herë në koncepte.
Interiori synon të krijojë një atmosferë lounge, me timon në formë D dhe ekran të vogël të vendosur para drejtuesit. Kia ishte më e hapur në lidhje me pjesën e brendshme, pasi e përshkroi atë si një mjedis “shumë gjithëpërfshirës” që riimagjinon marrëdhënien midis njeriut dhe makinës.
Në veçanti, kompania përmendi një ekran HUD të realitetit të shtuar që ka modalitetet Speedster, Dreamer dhe Gamer. Informacioni shfaqet në xhamin e përparmë nëpërmjet xhamit inteligjent, duke u mundësuar shoferëve të shohin “grafikë virtuale sikur të jenë duke lundruar mbi rrugë në tre dimensione“.
Kia pritet të zbulojë më shumë detaje së shpejti, por nuk ka angazhim për prodhim serik të Vision Meta Turismo.
