Inteligjenca artificiale vazhdon të jetë një temë e nxehtë për industrinë e teknologjisë, pasi Microsoft prezantoi aplikacionin e tij më të ri të AI, Copilot, dhe vetëm disa javë më vonë bëri një lajmërim zyrtar se për të aksesuar këtë shërbim do të ketë një tast specifik në tastierat e kompjuterëve Windows.
I shpallur në një postim të ri në blog, nënkryetari ekzekutiv i Microsoft dhe shefi i marketingut për konsumatorët, Yusuf Mehdi, zbuloi se kompania po prezanton një tast të ri për tastierat Windows këtë vit. Kjo shënon një ndryshim të rëndësishëm në paraqitjen e tastierës së Windows, duke përfaqësuar ndryshimin e parë të madh në tastierat e Microsoft që nga prezantimi i tastierës Windows në 1994.
“Pothuajse 30 vjet më parë, ne prezantuam tastin e Windows në tastierën e PC-së që u mundësoi njerëzve në mbarë botën të ndërveprojnë me Windows-in”, shkroi Mehdi. “Ne e shohim këtë si një moment tjetër transformues në udhëtimin tonë me Windows ku Copilot do të jetë pika hyrëse në botën e AI në PC”.
Siç mund ta shihni nga imazhi i mësipërm, tasti i Copilot do të jetë i vendosur pranë tastit Alt në anën e djathtë të tastierës. Natyrisht, tasti Copilot mund të vendoset diku tjetër pasi partnerët OEM të Microsoft fillojnë të prodhojnë laptopë që integrojnë këtë tast. Kur klikohet, tasti do të hapë Microsoft Copilot, një chatbot i AI i lançuar vitin e kaluar që është i integruar në Windows 11.
Ngjashëm me chatbots si Bard, ChatGPT dhe Grok, përdoruesit mund t’i bëjnë pyetje të ndryshme Microsoft Copilot. Mehdi nuk specifikoi se cilat produkte do të përfshinin këtë tast. Sidoqoftë, shumë prej partnerëve të saj OEM, si ASUS, do të jenë në CES 2024 javën e ardhshme. Disa nga këta laptopë të Windows të njoftuara tashmë mund të përfshijnë tastin Copilot.
