Ne jetojmë në një botë shumë të zhurmshme në varësi të komunitetit apo vendit të punës ku ndodhemi. Duke shtuar këtu të gjithë zhurmën në sfond të kufjeve nëpërmjet të cilave dëgjojmë vazhdimisht muzikë, lind nevoja për të bërë studime në lidhje me impaktin e këtyre zhurmave në veshët tanë me kalimin e kohës.
Apple ka nisur inciativat që në vitin 2019 për të kryer studime duke përdorur të dhënat e grumbulluara nga Apple Watch dhe iPhone, dhe tashmë ka publikuar një njoftim të ri për sa i përket studimit mbi dëgjimin e personave. Duke nisur nga nëntori i vitit 2019 e deri në dhjetor të vitit 2022 Apple ka analizuar të dhënat e grumbulluara nga 130,000 persona, veçanërisht në rastet ku niveli i zhurmave kalonte 70 decibel, një nivel që rrit rrezikun për shfaqjen e problemeve me dëgjimin me kalimin e viteve.
Sipas këtij studimi, rreth 1 në 3 adultë, pra 77 milionë adultë, janë të ekspozuar ndaj niveleve të larta të zhurmës.
Kur dikush ka humbje të pjesshme të dëgjimit nga ekspozimi ndaj zhurmave, kjo gjë ka ndodhur për shkak të një ekspozimi të vazhdueshëm e të gjatë ndaj zhurmave me nivel të lartë, duke dëmtuar kështu qelizat nervore brenda veshit. Me kalimin e kohës, ekspozimi për një kohë të gjatë ndaj zhurmave të mëdha mund të ndikojë në aftësinë e të dëgjuarit tek një person.
