Mashtrimet gjatë ditëve të sotme po bëhen gjithnjë e më kreative dhe të besueshme, prandaj dhe dëgjojmë shpesh herë paralajmërime nga persona zyrtarë për të mos rënë pre e këtyre skemave.
Skema më e re e mashtrimit duket se përfshin dërgimin e mesazheve drejt personave të ndryshëm me një “numër të imituar” për të siguruar shuma parash në mënyrë të paligjshme. Ky paralajmërim kësaj here erdhi nga vetë kryeministri Edi Rama përmes një postimi në rrjetin social X, i cili shpjegoi se policia e shtetit kishte ndaluar dhe çuar para drejtësisë një pjesë të këtyre mashtruesve.
Ai i bën thirrje qytetarëve të tregohen të kujdesshëm në raste të tilla, duke identifikuar vërtetësinë e dërguesit për të mos rënë pre e këtyre mashtrimeve, të cilat ai i cilëson si “lojëra kriminale”.
“Një lojë mashtruese me kompjutera që imitojnë numrin e telefonit për të dërguar mesazhe të rreme, ka dëmtuar disa persona deri më sot. Policia e Shtetit ka ndaluar dhe çuar para drejtësisë disa prej këtyre mashtruesve, të cilët kanë arritur të marrin para prej të dëmtuarve. Por ndërkohë që policia vazhdon punën e saj për identifikimin e të tjerëve, u sugjeroj të gjithë atyre që marrin mesazhe në emrin e personave publikë, të verifikojnë paraprakisht vërtetësinë e dërguesit, që të shmangin kurthin e kësaj loje kriminale”, ka shkruar Rama në llogarinë e tij në rrjetin social “X”.
