Me luftën e inteligjencës artificiale midis Google Gemini dhe ChatGPT të Microsoft-it që po përshkallëzohet, raportimet e reja tregojnë për ekzistencën e një produkti të ri që pritet të prezantohet më 9 maj nga OpenAI, dhe bëhet fjalë pikërisht për një motor të ri kërkimi të fuqizuar nga ChatGPT
Ky do të ishte një lajm shumë i keq për Google, pasi një prezantim i tillë do të sfidonte në mënyrë të drejtpërdrejtë dominancën e Google. Një përdorues në Reddit vuri re krijimin e certifikatave SSL për domenin search.chatgpt.com. Gjithashtu @nonmayorpete publikoi një tweet ku shkruante: “Search (dot) ChatGPT (dot) com, 9 maj“, duke lënë të kuptohet për një datë të mundshme prezantimi.
Aktualisht gjatë kërkimit të këtij domeni shfaqet një mesazh i fshehtë “Not found.” në vend që të tregojë një error 404 ose domain error, duke shtuar më tej spekulimet. Ndërsa nuk kemi më shumë detaje deri më tani, ideja e OpenAI për të lançuar një motor kërkimi ka kuptim strategjik.
Microsoft, një investitor i madh në OpenAI, deri më tani nuk ka arritur të sfidojë dominimin e kërkimit të Google përmes Bing. Disa muaj më parë, The Information raportoi se OpenAI ka zhvilluar një produkt kërkimi në web të mundësuar pjesërisht nga Bing. Këto zhvillime të fundit mund të sinjalizojnë se ky produkt është afër lançimit.
Nga informacionet e mbledhura deri më tani, ky produkt i ri i kërkimit i bazuar në ChatGPT mund të ofrojë përmbledhje të fuqizuara nga AI dhe rezultate të shpejta, njësoj si Search Generative Experience (SGE) e Google. 9 maji është shumë pranë, kështu që së shpejti do të zbulojmë se çfarë ka rezervuar OpenAI për ne.
