Rekordi i shpejtësisë për dronët është thyer sërish edhe pse ende në mënyrë jozyrtare, duke treguar se kufijtë e teknologjisë FPV po shtyhen gjithnjë e më tej. Dyshja Ben Biggs dhe Aidan Kelly kanë rimarrë “kurorën” e shpejtësisë, pasi arritën ta çonin dronin e tyre Blackbird në një shifër mbresëlënëse prej 730 km/h, duke lënë pas rekordin e mëparshëm me rreth 70 km/h.
Gjatë ditës së dytë të testimeve, Blackbird arriti 730 km/h në një fluturim me erë pas, ndërsa në kthim, përballë erërave të forta, shpejtësia maksimale ishte 640 km/h. Kjo i dha ekipit një mesatare prej 685 km/h, shumë më lart se rekordi zyrtar prej 657.59 km/h i certifikuar nga Guinness World Records, i mbajtur nga Luke Bell dhe Mike Bell. Megjithatë, tentativa e re ende nuk është certifikuar zyrtarisht.
Një nga ndryshimet kyçe te Blackbird ishte përdorimi i helikave të reja prej fibre karboni, të punuara me dorë dhe me një skaj prerës në formë “dhëmbësh sharrë”. Ky dizajn ndihmon që ajri të rrjedhë më drejt mbi teh, duke rritur efikasitetin aerodinamik. Një detaj i vogël, por vendimtar në shpejtësi mbi 700 km/h.
Testimet nuk ishin pa probleme. Ditën e parë, droni humbi sinjalin rreth 630 km/h dhe u konsiderua i humbur, derisa u gjet më vonë i dëmtuar. Ditën e dytë, me vetëm një dron të mbetur, erëra deri në 60 km/h dhe shi në horizont, Blackbird më në fund theu barrierën psikologjike prej 700 km/h. Temperaturat e baterive arritën rreth 80°C, rryma shkoi deri në 400 amper për rreth 10 sekonda dhe droni u ul duke nxjerrë tym, por mbijetoi.
Nëse Biggs dhe Kelly arrijnë ta përsërisin këtë performancë nën kushtet strikte të Guinness, titulli i dronit më të shpejtë në botë pritet të ndryshojë duar edhe një herë.
