Apple njoftoi se drejtuesi i inteligjencës artificiale, John Giannandrea, do të largohet nga ky rol dhe do të dalë në pension në pranverën e vitit 2026. Deri atëherë, ai do të shërbejë si këshilltar, ndërsa rolin e tij do ta marrë Amar Subramanya, ish-ekspert i AI-së në Microsoft dhe më herët inxhinier me 16 vite përvojë në Google.
Subramanya do të raportojë tek Craig Federighi dhe do të drejtojë Apple Foundation Models, kërkimin në machine-learning dhe ekipet e sigurisë e vlerësimit të AI. Apple theksoi se përvoja e tij e thellë në AI dhe ML do të jetë kyçe për zhvillimet e ardhshme të Apple Intelligence.
Disa nga ekipet që më parë drejtoheshin nga Giannandrea do të kalojnë tek Sabih Khan, drejtori i ri operativ, dhe tek Eddy Cue, që mbikëqyr shërbimet e Apple. CEO Tim Cook vlerësoi kontributin e Giannandrea-s në avancimin dhe tha se pret me interes bashkëpunimin me Subramanya, ndërsa nënvizoi rolin e rëndësishëm të Federighi-t në strategjinë e AI të Apple. Kompania deklaroi se me ndryshimet e reja strukturore është gati të përshpejtojë zhvillimin e eksperiencave “inteligjente, të besueshme dhe thellësisht personale”.
Largimi i Giannandrea-s vjen në një moment të ndjeshëm për Apple, pas dështimit të madh të Siri-t. Versioni i ri i “Apple Intelligence” u prezantua në WWDC 2024 dhe u promovua si pjesë kryesore e iPhone 16, por në fillim të 2025 Apple u detyrua të njoftonte se nuk ishte në gjendje të lançonte funksionalitetin e premtuar.
Përditësimet u shtynë deri në pranverën 2026. Situata shkaktoi largime të shumta nga ekipi i AI-së, ndërsa kompania u përpoq të rregullonte Siri dhe të sillte funksione si konteksti personal, ndërgjegjësimi në ekran dhe integrim më të mirë me aplikacionet. Ndërkohë, raportohet se Apple po negocion me Google për të furnizuar një version më të avancuar të Siri-t dhe veçorive të Apple Intelligence që pritet të prezantohen vitin e ardhshëm.
