Instagram do të rikthejë plotësisht punën në zyrë duke filluar nga 2 shkurti i vitit të ardhshëm. Sipas një memoje të brendshme të publikuar fillimisht nga buletini Sources i Alex Heath, drejtuesi i Instagramit, Adam Mosseri, u ka komunikuar punonjësve se stafi në SHBA me zyra dhe tavolina të caktuara do të duhet të jetë fizikisht i pranishëm pesë ditë në javë. Ai theksoi se kompania duhet të “evoluojë” dhe paralajmëroi se “2026 do të jetë një vit i vështirë”, duke lënë të kuptohet se vendimi është pjesë e një ristrukturimi më të gjerë përballë sfidave që priten.
Megjithatë, Mosseri la të hapur një dritare fleksibiliteti, duke thënë se punonjësit mund të punojnë edhe nga distanca “kur të jetë e nevojshme”, por i ftoi të përdorin “gjykimin e tyre më të mirë” për të vendosur kur kjo është e përshtatshme. Ky rikthim i plotë në zyrë vjen në një kohë kur shumë kompani teknologjike kanë zgjedhur modele hibride pas pandemisë së COVID-19. Meta, kompania mëmë e Instagram, vendosi në 2023 politikën e tre ditëve në zyrë, por rezistenca e punonjësve në industrinë e teknologjisë ndaj rikthimit të plotë ka qenë e dukshme, pavarësisht pretendimeve të drejtuesve se puna me prani fizike sjell përfitime të rëndësishme për bashkëpunimin dhe kulturën e brendshme.
Përveç këtij ndryshimi, Mosseri njoftoi edhe ndryshime të tjera të synuara për ta bërë kompaninë “më të zgjuar, më kreative dhe më të shkathët”. Një ndër masat më të mirëpritura pritet të jetë zvogëlimi i takimeve të përsëritura: çdo takim i rregullt do të anulohet automatikisht çdo gjashtë muaj, përveç rasteve kur konsiderohet “absolutisht i domosdoshëm”.
Po ashtu, ekipi do të inkurajohet të përdorë më shumë prototipe për prezantimet e produkteve, në vend të prezantimeve tradicionale me slide, si dhe të ndjekë një proces më të shpejtë vendimmarrjeje. Këto masa synojnë të rrisin shpejtësinë organizative në një periudhë kur presionet konkurruese dhe kërkesat për inovacion janë më të larta se kurrë.
