Më tepër se 1,000 ekspertë, studiues apo mbështetës të inteligjencës artificiale i janë bashkuar një thirrje për të ndaluar në mënyrë të përkohshme krijimin e sistemeve gjigande të inteligjencës artificiale për të paktën 6 muajt në vijim, në mënyrë që të studiohen mirë aftësitë dhe rreziqet e sistemeve të tilla.
Kërkesa është bërë nëpërmjet një letre publike që është firmosur nga shumë investitorë të ndryshëm të AI duke përfshirë këtu Steve Wozniak apo dhe Elon Musk, i cili është bashkë-themelues i OpenAI, kompanisë që krijoi ChatGPT. Në listën e personave që kanë mbështetur një lëvizje të tillë janë dhe inxhinierët në Amazon, DeepMind, Google, Meta dhe Microsoft.
“Gjatë muajve të fundit ne kemi parë shumë kompani që janë përfshirë në garën për zhvillimin e mendjeve dixhitale më të zgjuara se aktualisht – por në të vërtetë as krijuesit e tyre nuk mund të kuptojnë, parashikojnë apo të kontrollojnë këto sisteme.” shkruhet në letër.
“Sistemet e fuqishme AI duhet të zhvillohen vetëm në një moment kur ne besojmë se efektet e saj do të jenë pozitive dhe rreziqet të menaxhueshme.”
Në një deklaratë në muajin shkurt, bashkë-themeluesi i OpenAI, Sam Altman tha: “Deri në një pikë, mund të jetë e rëndësishme që të bëhet një rishikim i pavarur para se të nisim të trajnojmë sistemet e së ardhmes, si dhe në rastet më të avancuara të jemi dakord në limitimin e shkallës së rritjes së fuqisë kompjuterike të përdorur për të gjeneruar modele të reja.”
Me sa duket dhe autorët e letrës së hapur janë bazuar në këtë deklaratë për të bërë një kërkesë të tillë.
