Analistët kanë pohuar se Apple mund të kërkojë një abonim për disa nga veçoritë më të avancuara të Apple Intelligence në një fazë, me tarifa prej $10-20 në muaj.
Një mundësi, thonë ata, është që kompania do të kërkonte një abonim në Apple One për të aksesuar grupin e plotë të veçorive të AI. Ata sugjerojnë që Apple mund të ndjekë modelin e përdorur nga OpenAI dhe Microsoft: Qasje falas në një numër të kufizuar funksionesh të AI, me një abonim që kërkohet për të përdorur tërësinë e shërbimeve.
“Apple është një nga kompanitë e pakta të pajisjeve që ka bindur përdoruesit me sukses për t’u abonuar në shërbimet me vlerë të shtuar që ofron”, tha për CNBC këtë javë Ben Wood, shefi i kërkimit në CCS Insight. “Si rezultat, ajo ka krijuar një precedent me përdoruesit e saj që duhet të paguajnë për më shumë shërbime premium. Mbi këtë bazë, nuk mund të përjashtohet që Apple mund të zgjedhë të tarifojë për veçori më të avancuara brenda Apple Intelligence.”
Apple Intelligence do të shpërndahet në faza, me veçoritë e para tashmë të disponueshme në versionet beta të zhvilluesve dhe ka të ngjarë të lançohet zyrtarisht (edhe pse etiketuar si një produkt beta) menjëherë pas daljes në shitje të linjës së iPhone 16. Siri krejtësisht i ri nuk pritet të jetë i disponueshëm deri afër fundit të vitit, ose në 2025.
