Dell po paralajmëron klientët se janë sulmuar nga hakerët të cilët pretendojnë se kanë vjedhur informacione për rreth 49 milionë klientë. Prodhuesi i kompjuterave filloi t’u dërgonte me email klientëve duke i njoftuar rreth situatës, pasi bëhet fjalë për të dhënat e regjistruara në një portal Dell që përmbante informacione për klientët në lidhje me blerjet.
“Aktualisht jemi duke hetuar një incident që përfshin një portal Dell, i cili përmban një bazë të dhënash me lloje të kufizuara informacioni për klientët në lidhje me blerjet nga Dell”, thuhet në një njoftim të Dell për sa i përket vjedhjes së të dhënave. “Ne besojmë se nuk ka një rrezik të rëndësishëm për klientët tanë duke pasur parasysh llojin e informacionit të përfshirë.”
Dell deklaron se infromacionet që hakerët kanë në duar rreth klientëve janë:
- Emri
- Adresa fizike
- Informacioni i harduerit dhe porosisë së Dell, duke përfshirë etiketën e shërbimit, përshkrimin e artikullit, datën e porosisë dhe informacionin përkatës të garancisë
Kompania thekson se informacioni i vjedhur nuk përfshin informacione financiare ose pagesash, adresa emaili ose numra telefoni dhe se ata po punojnë me forcat e rendit për të hetuar incidentin.
Siç u raportua për herë të parë nga Daily Dark Web, një haker i quajtur Menelik u përpoq të shiste një databazë të Dell në forumin e hakerëve të Breach Forums më 28 prill. Ai tregonte se ata vodhën të dhëna nga prodhuesi i kompjuterave për “49 milionë klientë dhe sisteme të tjera informacioni të blera nga Dell midis 2017-2024“.
