Apple Stores në SHBA kanë nisur të shesin një bravë dere të jashtme e cila mund të hapet përmes prekjes nga një iPhone apo një Apple Watch. Level Lock+ kushton $329 dhe është brava e parë e mbështetur nga Home Key dhe që po shitet në Apple Stores.
Kur kjo bravë instalohet në derë, përdoruesit mund ta përdorin atë për ta kyçur apo për ta hapur përmes Apple Home Key, një shërbim që përdor NFC në software-in e Apple. Gjithashtu përdoruesit mund të shkëmbejnë këtë “çels” me miqtë e tyre.
Për kompaninë kjo është një arritje e madhe që nga prezantimi i shërbimit në vitin 2021. Home Key është një tjetër shembull që tregon se si Apple po përpiqet të dixhitalizojë gjëra të ndryshme që normalisht kryhen nëpërmjet mjeteve fizike.
Është e ditur se nëpërmjet këtyre ndryshimeve, Apple e bën më të vështirë për përdoruesit të shkojnë drejt një smartphone-i Android. Sigurisht nëse ju keni instaluar një bravë dere e cila mund të hapet vetëm nga një iPhone, ju nuk do të ndërroni kompaninë e telefonit.
Bashkë me Home Key, Apple ka prezantuar Car Key, e cila hap makinat e suportuara si BMW dhe Hyundai, dhe Room Key që përdoret për hapjen e dyerve në dhomave të hotelit.
