SHBA kanë akuzuar Amazon se ka mashtruar klientët duke rinovuar automatikisht abonimet e tyre në Amazon Prime dhe duke e bërë të vështirë ndërprerjen e këtij abonimi. Këto deklarata u bënë nga përfaqësuesit e Federal Trade Commission, të cilët cituan “dizajnin manipulues të kompanisë”.
Amazon i refuzoi menjëherë këto akuza, duke i cilësuar si “false për sa i përket fakteve dhe ligjit”.
Në të gjithë botën janë më tepër se 200 milionë njerëz të abonuar në Amazon Prime. Ky shërbim ofron përfitime për sa i përket kohës së transportimit të produkteve që blihen në platformë, dhe kushton $139 në vit ose $14,99 në muaj.
FTC tregoi se Amazon përdori një dizajn të caktuar të website-it që nxiste klientët të regjistroheshin në Prime, ndërkohë që abonimi i tyre rinovohej automatikisht çdo muaj. Kompania tentoi gjithashtu që ta bënte sa më të vështirë për këto klientë që të ndërprenin abonimin, pasi “këto ndryshime mund të ndikonin negativisht në Amazon”, tregon FTC.
“Amazon u përpoq të mashtronte dhe të pengonte klientët nga ndërprerja e abonimit pa pëlqimin e tyre, duke shkaktuar jo vetëm irritim tek këta klientë por edhe humbje të konsiderueshme parash.” tha Lina Khan, anëtare e FTC.
