Pavarësisht kufizimeve të njohura në siguri, identifikimi me gjurmë gishtash mbetet një nga metodat më të përdorura për zhbllokimin e pajisjeve dhe verifikimin e identitetit në laptopë, tableta dhe telefona inteligjentë. Megjithatë, rritja e ndjeshme e cilësisë së kamerave të smartphone-ve po ringjall shqetësime serioze, pasi gjurmët e gishtave mund të “vidhen” edhe nga fotografi të zakonshme.
Debati u ndez sërish këtë javë në Kinë, pasi ekspertë sigurie paralajmëruan se foto ku gishtat drejtohen nga kamera, nga një distancë rreth 1.5 metra, mund të përmbajnë mjaftueshëm detaje për të rindërtuar një gjurmë gishti. Në teori, këto të dhëna mund të përdoren për të mashtruar sensorë biometrikë të lidhur me telefona, laptopë, sisteme pagesash apo llogari online.
Eksperti financiar Li Chang theksoi se mjetet moderne të editimit dhe inteligjencës artificiale mund të theksojnë brazdat e gjurmëve të gishtave të fshehura në selfie të përditshme. Ndërkohë, profesori Jing Jiwu nga University of Chinese Academy of Sciences sqaroi se ndriçimi dhe turbullimi i lëvizjes ende e bëjnë procesin të vështirë, por imazhet me rezolucion të lartë ose disa foto të kombinuara rrisin ndjeshëm mundësinë e suksesit.
Tema u përhap me shpejtësi në rrjetet sociale kineze, kryesisht sepse pozimi me 2 gishta mbetet shumë i zakonshëm në selfie në Azi. Në fakt, ideja nuk është e re. Studiuesit e sigurisë kanë demonstruar sulme të tilla prej më shumë se një dekade. Anëtari i Chaos Computer Club, Jan Krissler, arriti të anashkalonte Apple Touch ID që në vitin 2013 dhe më pas rindërtoi gjurmë gishtash nga foto publike.
Ndryshe nga e kaluara, barrierat teknike po bien. Në vitin 2021, Kraken Security Labs tregoi se mjaftonin një foto, Photoshop, një printer lazer dhe pak ngjitës për të krijuar një gjurmë funksionale. Megjithatë, pavarësisht rreziqeve, biometria vazhdon të përdoret gjerësisht për komoditet.
