Aeroporti Ndërkombëtar i San Antonio në Teksas ka vendosur të përdorë një robot autonom që peshon 190kg për të forcuar operacionet e tij të sigurisë.
Roboti K5 1.62 metra i gjatë, i prodhuar nga kompania Knightscope, do të dalë në shitje në dy muajt e ardhshëm. K5 është i pajisur me një kamera 360 gradë dhe mikrofona të shumtë për të monitoruar ambientet rreth tij. Megjithatë, shpejtësia e tij maksimale prej vetëm 5km/h dhe paaftësia e tij për të lëvizur në shkallë do të thotë se do të përdoret kryesisht për monitorim dhe jo për të ndjekur kriminelët e dyshuar.
Në mënyrë të veçantë, K5 do të “monitorojë dyert në pjesët e aeroportit ku publiku nuk ka qasje“. Alarmet bien kur këto dyer hapen aksidentalisht ose në mënyrë të papërshtatshme. Në raste të tilla, roboti do të kontrollojë distinktivin e personit që hap derën, me informacionin që më pas do t’i transmetohet personelit të sigurisë së aeroportit, i cili do të konfirmojë nëse individi ka leje aksesi dhe më pas do të veprojë në përputhje me rrethanat.
Anëtari i këshillit lokal të qytetit Jalen McKee-Rodriguez votoi kundër vendosjes së K5, duke thënë se prania e tij “ngre shqetësime në lidhje me privatësinë, mbikëqyrjen dhe profilizimin racor”.
“Ky është një shqetësim themelor që kam me këto lloje robotësh dhe pajisjesh,” shtoi ai. Por drejtori i aeroporteve në San Antonio, Jesus Saenz Jr këmbënguli: “K5 nuk do të përdoret për mbikëqyrje, për asnjë qëllim. Kjo nuk do të përdoret për të monitoruar lëvizjet e individëve të ndryshëm. Kjo është një përgjigje ndaj alarmeve të dyerve që ndodhin në aeroport.”
Knightscope’s K5 kohët e fundit përfundoi një testim në New York City në një përpjekje të udhëhequr nga kryebashkiaku Eric Adams. Ky robot patrullonte stacionin e metrosë në Times Square, por shpesh herë nevojitej ndërhyrja e oficerëve pasi qytetarët e rrëzonin këtë robot.
