Reuters dhe Ipsos publikuan një sondazh të ri gjatë ditës së mërkurë për shtetasit amerikanë dhe zbuluan se shumica prej tyre mendonin se zhvillimi i jashtëzakonshëm i AI është një kërcënim për njerëzimin.
Që nga momenti kur ChatGPT u shndërrua në një fenomen botëror dhe më pas nisi të integrohej në aplikacionet që ne i përdorim çdo ditë, AI është shndërruar në temën kryesore të bisedimit. ChatGPT nisi një garë në industrinë e inteligjencës artificiale, ku Microsoft dhe Google janë kundërshtarët më të rëndësishëm që po luftojnë për të sjellë të parët shërbimet e reja AI.
Sipas të dhënave të gjeneruara nga sondazhi i Reuters/Ipsos mësohet se 61% e të anketuarve besojnë se inteligjenca artificiale mund të shndërrohet në një rrezik për njerëzimin, ndërkohë që 22% e personave të tjerë nuk e besonin këtë gjë, dhe 17% nuk ishin të sigurtë.
Personat që ishin mbështetës të Donald Trump ishin dhe më të shqetësuar mbi këtë fenomen, pasi 70% e tyre mendonin se AI është e rrezikshme për njerëzimin. Megjithatë dhe pse amerikanët janë të shqetësuar rreth AI, kanë shqetësime të tjera më të rëndësishme si rritja e fondeve të forcave ligjzbatuese për të luftuar krimin (77%) apo rreziku për një reçesion (82%).
Nga ana tjetër industria dëshiron që qytetarët të shikojnë dhe anët pozitive të AI, si përshembull revolucionarizimi në shpikjen e ilaçeve të reja.
