Studiuesit në Cybernews kanë zbuluar një sasi të madhe prej afro 10 miliardë fjalëkalimesh në një forum popullor hakerimi në atë që ata e cilësojnë si “dokumenti më masiv me fjalëkalime i bërë leak ndonjëherë”.
I titulluar rockyou2024.txt, dokumenti u postua më 4 korrik nga një person me emrin ObamaCare dhe përmban 9,948,575,739 fjalëkalime unike me tekst të thjeshtë. “Krishtlindjet erdhën herët këtë vit,” tha përdoruesi ObamaCare në forum. “Po ju prezantoj me listën e re rockyou2024 që përmban mbi 9.9 miliardë passwords.”
Përdoruesi iu bashkua forumit vetëm në fund të majit, por ata kanë postuar të dhëna edhe nga sulme të tjera kibernetike. Sipas Cybernews, ky skedar RockYou2024 është “një përzierje e vjedhjes së të dhënave të vjetra dhe të reja“.
Pra, nuk është domosdoshmërisht një shkelje e re që futi në grackë 10 miliardë fjalëkalime. Por, përpilimi i të gjitha këtyre fjalëkalimeve në një databazë masive dhe të kërkueshme “ngre ndjeshëm rrezikun e sulmeve të plotësimit të kredencialeve“, thotë Cybernews.
Cybernews ofron gjithashtu një kërkues të posaçëm për të kuptuar nëse fjalëkalimi juaj gjendet në këtë databazë. Gjithçka që duhet të bëni është të shkruani fjalëkalimin tuaj dhe të prisni rezultatin.
Nëse ndiheni të rrezikuar, Geek Room ju sugjeron të ndërroni fjalëkalimin tuaj dhe të përdorni kombime midis shkronjave të mëdha, të vogla, numrave dhe shenjave të ndryshme.
