Një burrë australian me insuficiencë kardiake është bërë personi i parë në botë që doli nga spitali me një zemër artificiale, të cilën e përdori për 100 ditë. Studiuesit dhe mjekët australianë pas operacionit njoftuan të mërkurën se implanti kishte qenë një “sukses klinik i veçantë” pasi burri jetoi me pajisjen për më shumë se 100 ditë përpara se t’i nënshtrohej një transplanti zemre nga donatori në fillim të marsit.
Zemra artificiale BiVACOR, e shpikur nga Dr Daniel Timms i lindur në Queensland, është pompa e parë e implantueshme për qarkullimit të gjakut në botë që mund të veprojë si një zëvendësues i zemrës së njeriut, duke përdorur teknologjinë e levitimit magnetik për të imituar qarkullimin natyral të gjakut në një zemër të shëndetshme.
Implanti, ende në fazat e hershme të studimit klinik, është projektuar për pacientët me insuficiencë kardiake biventrikulare të gradës së rëndë, e cila zakonisht zhvillohet pas një ataku në zemër apo sëmundjeve koronare të zemrës, por edhe sëmundje të tjera si diabeti – të cilat dëmtojnë ose dobësojnë aktivitetin e zemrës në mënyrë që ajo nuk mund të pompojë efektivisht gjakun nëpër trup.
Çdo vit më shumë se 23 milionë njerëz në mbarë botën vuajnë nga insuficienca kardiake, por vetëm 6,000 kryejnë transplantin e zemrës, sipas qeverisë australiane, e cila siguroi $50 milionë për të zhvilluar dhe komercializuar pajisjen BiVACOR si pjesë e programit zemrës artificiale.
Implanti është projektuar si një urë për të mbajtur pacientët në jetë derisa të sigurohet zemër nga donatorët, por ambicia afatgjatë e BiVACOR është që marrësit e implantit të jenë në gjendje të jetojnë me pajisjen e tyre pa pasur nevojë për transplantim zemre. Pacienti, një burrë rreth të 40-ave nga Uellsi i Ri Jugor, i cili po përjetonte insuficiencë të rëndë të zemrës, doli vullnetarisht për t’u bërë marrësi i parë i zemrës artificiale në Australi dhe i gjashti në botë. 5 implantet e para u zhvilluan vitin e kaluar në SHBA dhe të gjithë pacientët shfrytëzuan zemrën artificiale me kohën më të gjatë ndërmjet prej 27 ditësh deri nësigurimin e një zemre nga donatorët.
Kirurgu Paul Jansz tha se ishte një privilegj të ishe pjesë e një momenti historik dhe pionier të tillë mjekësor australian. “Ne kemi punuar për këtë moment për vite dhe jemi jashtëzakonisht krenarë që kemi qenë ekipi i parë në Australi që e ka kryer këtë procedurë,” tha Jansz.
