Një start-up neuroteknologjik nga Kalifornia, REMspace, ka njoftuar se ka realizuar për herë të parë komunikim mes dy njerëzve gjatë gjumit, duke e cilësuar këtë si një “moment historik” që mund të “hapë dimensione të reja” në komunikim. Kompania me bazë në San Francisco, e specializuar në ëndrrat ku ndërgjegjja është e ruajtur (lucid dreaming) dhe përmirësimin e gjumit, tha se më 24 shtator dy pjesëmarrës arritën të hynin në gjendje ëndrre të ndërgjegjshme dhe të shkëmbenin një mesazh të thjeshtë përmes një pajisjeje të zhvilluar posaçërisht prej tyre.
Pajisja monitoronte nga distanca të dhënat e trurit, frymëmarrjen dhe rrahjet e zemrës në kohë reale, përmes ËiFi. Pasi serveri i kompanisë konstatoi se njëri pjesëmarrës kishte hyrë në fazën REM, i transmetoi një fjalë të rastësishme nëpërmjet kufjeve, të cilën ai e përsëriti në gjendje ëndrre. Më pas, kjo fjalë iu dërgua kandidatit të dytë, i cili e përsëriti pas zgjimit, duke shënuar kështu “bisedën e parë” të dokumentuar në botë gjatë ëndrrës.
Sipas CEO së REMspace, Michael Raduga, eksperimenti u përsërit me sukses më 8 tetor, duke dëshmuar potencialin e madh të kësaj teknologjie për të revolucionarizuar mënyrën se si njerëzit komunikojnë. Ai e krahasoi ndikimin e saj të ardhshëm me revolucionin që solli inteligjenca artificiale, duke parashikuar se pajisje të tilla “do të bëhen po aq të zakonshme sa telefoni”.
Megjithatë, teknologjia ende nuk është verifikuar nga shkencëtarë të jashtëm dhe nuk është riprodhuar në kushte të pavarura. REMspace thotë se punimi shkencor mbi eksperimentin është dorëzuar për shqyrtim dhe pritet të publikohet brenda disa muajsh.
Raduga, i njohur për eksperimentet e tij të rrezikshme mbi gjumin, u bë i famshëm pasi tentoi të kontrollonte ëndrrat duke i vendosur vetes një mikroçip në tru, një procedurë që përfundoi me ndërhyrje spitalore 5 javë më vonë.
