Shkencëtarët kanë zhvilluar një orë aq të saktë sa mund të ndryshojë përkufizimin zyrtar të sekondës. Bëhet fjalë për orën optike me rrjet strontiumi, një nga matësit më precizë të kohës të krijuar ndonjëherë, e aftë të masë sekondat me saktësi deri në 19 shifra dhjetore. Për ta ilustruar këtë nivel precizioni, nëse ora do të funksiononte për rreth 30 miliardë vjet (më shumë se dyfishi i moshës së universit) ajo do të gabonte vetëm rreth një sekondë.
Ky përparim është rezultat i avancimeve të mëdha teknologjike në fushën e orëve optike dhe përfaqëson një hap vendimtar drejt rishikimit të përkufizimit të sekondës në Sistemin Ndërkombëtar të Njësive (SI). Në një studim të botuar në revistën shkencore Metrologia, studiuesit theksojnë se ora e re arrin nivelin e saktësisë së nevojshme për planin afatgjatë të ripërcaktimit të sekondës.
Aktualisht, sekonda përcaktohet mbi bazën e lëkundjeve të atomit të ceziumit-133, një standard i vendosur që nga viti 1967. Megjithëse jashtëzakonisht i saktë, ky sistem ka ende kufizime. Strontiumi, nga ana tjetër, lëkundet me një ritëm shumë më të shpejtë, rreth 700 kuadrilion tik-e në sekondë, duke ofruar një bazë shumë më të qëndrueshme dhe precize për matjen e kohës.
Sipas shkencëtarëve, tashmë tre orë optike me strontium kanë arritur pragun e kërkuar të saktësisë, një kusht kyç për ndryshimin zyrtar të përkufizimit të sekondës. Vendimi përfundimtar pritet të merret nga General Conference on Weights and Measures, e cila mblidhet çdo katër vjet, me një propozim të mundshëm në vitin 2030.
Studiuesit nga Chinese Academy of Sciences theksojnë se kjo arritje hap rrugën për orë optike portative dhe hapësinore, me aplikime të ardhshme në navigimin satelitor, testimin e ligjeve themelore të fizikës, studimin e materies së errët dhe krijimin e një standardi global ultra-preciz të kohës.
