Një studim i vitit 2024 sugjeron se acidet yndyrorë omega-3, të njohur kryesisht për përfitimet e tyre në shëndetin mendor dhe fizik, mund të ndihmojnë gjithashtu në uljen e agresivitetit. Omega-3 gjenden në vajin e peshkut dhe në suplemente ushqimore, dhe prej kohësh janë lidhur me mirëqenien e shëndetit mendor, përfshirë parandalimin e skizofrenisë. Studiuesit theksojnë se sjellja agresive dhe antisociale mund të lidhet pjesërisht me mungesën e ushqyesve të caktuar, pasi dieta ndikon drejtpërdrejt në kiminë e trurit.
Studimi u krye nga studiues të Universitetit të Pensilvanisë, të cilët realizuan një meta-analizë duke përfshirë 29 studime të kontrolluara rastësisht, me gjithsej 3,918 pjesëmarrës. Rezultatet treguan një efekt të moderuar, por domethënës afatshkurtër: deri në 28% ulje të agresivitetit, pavarësisht moshës, gjinisë, diagnozës mjekësore apo dozës dhe kohëzgjatjes së trajtimit.
Studimet, të zhvilluara ndërmjet viteve 1996 dhe 2024, zgjatën mesatarisht 16 javë dhe përfshinë grupe të ndryshme moshe, nga fëmijë nën 16 vjeç deri te të rritur 50–60 vjeç. Reduktimi i agresivitetit u vu re si në agresionin reaktiv (reagim ndaj provokimit), ashtu edhe në agresionin proaktiv (sjellje e planifikuar), çka nuk ishte e qartë nga studimet e mëparshme.
Neurokriminologu Adrian Raine theksoi se ka ardhur koha që suplementimi me omega-3 të merret seriozisht si mjet ndihmës për uljen e agresivitetit, qoftë në komunitet, klinika apo edhe në sistemin e drejtësisë penale. Megjithëse nuk është një zgjidhje magjike për dhunën, ai sugjeron se konsumimi i rregullt i peshkut ose suplementeve me omega-3 mund të sjellë përfitime reale.
