Shkencëtarët kanë zbuluar aksidentalisht një trajtim të ri të mundshëm për alopecinë androgjenike, shkaku më i zakonshëm i rënies së flokëve si tek meshkujt ashtu edhe tek femrat në mbarë botën.
E gjitha filloi me kërkimin mbi një sheqer që gjendet natyrshëm në trup dhe ndihmon në formimin e ADN-së: pjesa ‘dezoksiribozë’ e acidit dezoksiribonukleik. Ndërsa studionin se si këto sheqerna shërojnë plagët e minjve kur aplikohen mbi lëkurë, shkencëtarët në Universitetin e Sheffield dhe Universitetin COMSATS në Pakistan vunë re se qimet rreth lezioneve po rritej më shpejt se te minjtë e patrajtuar.
Për të hetuar më tepër këtë zbulim, ata morën minj meshkuj me rënie të flokëve të shkaktuar nga testosteroni dhe hoqën gëzofin nga shpina e tyre. Çdo ditë, studiuesit lyenin një dozë të vogël xhel sheqeri deoksiribozë në lëkurën e ekspozuar dhe brenda disa javësh, gëzofi në këtë rajon pësoi një rritje ‘të fuqishme’, me qime të gjata dhe të trasha. Xheli i deoksiribozës ishte aq efektiv, sa studiuesit zbuluan se funksiononte po aq mirë sa minoxidil, një trajtim aktual për humbjen e flokëve.
“Studimi ynë sugjeron se përgjigja për trajtimin e rënies së flokëve mund të jetë aq e thjeshtë sa përdorimi i një sheqeri deoksiriboz natyral për të rritur furnizimin me gjak në folikulat e flokëve për të inkurajuar rritjen e flokëve”, thotë Sheila MacNeil nga Universiteti i Sheffield.
Alopecia androgjenike, është një problem i shkaktuar nga gjenetika, nivelet e hormoneve dhe plakja, dhe shfaqet ndryshe tek meshkujt dhe femrat. Çrregullimi prek deri në 40% të popullsisë.
Ndërsa minoxidil mund të funksionojë për të ngadalësuar humbjen e flokëve dhe për të nxitur një rritje të caktuar, ai nuk funksionon për të gjithë ata që përjetojnë rënie të flokëve. Ekzistojnë dhe alternativa të minoxidil, si finasteride, por që mund të shoqërohet me efekte anësore si si disfunksion erektil, dhimbje testikujsh ose gjoksi, ulje të dëshirës seksuale dhe depresion.
Studiuesit nuk janë të sigurt pse xheli i deoksiribozës stimulon rritjen e flokëve më të gjatë dhe më të trashë te minjtë, por rreth zonës së trajtuar, ekipi vuri re një rritje të enëve të gjakut dhe qelizave të lëkurës.
“Sa më mirë të jetë furnizimi me gjak i bulbit të flokëve, aq më i madh është diametri i tyre dhe aq më shumë rriten flokët”, shpjegojnë studiuesit. Nëse xheli i deoksiribozës rezulton efektiv edhe te njerëzit, ai mund të përdoret për të trajtuar alopecinë apo edhe për të stimuluar rritjen e flokëve, qerpikëve dhe vetullave pas kimioterapisë.
