Shkencëtarët kanë krijuar një krem për lëkurën që shëron dëmtimet nga dielli dhe bllokon një proces që shkakton rrudha.
Studiuesit thonë se është një krem dielli i “gjeneratës së ardhshme”, i cili jo vetëm mbron nga djegia nga dielli, por riparon me shpejtësi dëmtimin e nivelit të ulët të lëkurës nga dielli në kohë reale. Kremi përmban një version artificial të melaninës, që shëron lëkurën pasi goditet nga rrezet e diellit. Ata tani kanë krijuar një ‘super-melaninë’ e cila funksionon edhe më mirë.
I përdorur në një krem për lëkurën, ai kap dhe neutralizon ‘radikalet e lira’ të dëmshme – molekula në trup të shkaktuara nga rrezet ultravjollcë të diellit, të cilat mund të shkatërrojnë kolagjenin e nevojshëm për lëkurë të shëndoshë, elastike dhe rinore.
Nëse përdoret për një kohë të gjatë, kremi mund të parandalojë varjen e lëkurës dhe rrudhat që shfaqen në fytyrat e njerëzve pas vitesh ekspozimi në diell. Dr Kurt Lu, një anëtar i ekipit shkencor që kreu studimin, dhe njëkohësisht dermatolog dhe biolog i lëkurës nga Universiteti Northwestern në SHBA, tha: “Shumë njerëz provojnë ilaçe pasi janë djegur nga dielli për të qetësuar dhimbjen, ose një krem për të reduktuar inflamacionin, por në të vërtetë nuk kishte asnjë produkt më parë për të riparuar dëmin e shkaktuar në lëkurë nga dielli.”
“Ky riparim është i nevojshëm vazhdimisht, sepse nëse ecni me fytyrë të zhveshur çdo ditë në diell, vuani nga një bombardim i shkallës së ulët dhe i vazhdueshëm i dritës ultravjollcë.”
Studiuesit testuan super-melaninën e përzier me ujë, të cilën e aplikuan në lëkurën e dhuruar nga 10 persona që kishin bërë operacione plastike. Lëkura u trajtua me një ilaç që shkakton të njëjtin efekt në lëkurë si dëmtimi ekstrem që shkakton djegia nga dielli. Kur kremi i lëkurës me super-melaninë u aplikua në 10 mostrat e lëkurës, gjysma nuk patën flluska.
