Shikimi i fëmijëve po përkeqësohet në të gjithë botën dhe ka një fajtor të qartë: qëndrimi për kohë të gjata para ekraneve.
Një studim global i botuar në British Journal of Ophthalmology zbuloi se më shumë fëmijë po zhvillojnë miopi, në vitet e fundit. Studiuesit thanë se ky problem është më prezent në fëmijët që shpenzojnë më shumë kohë duke bërë gjëra në distancë të afërt, të tilla si përdorimi i pajisjeve celulare, shikimi i TV dhe luajtja e video-lojërave, veçanërisht gjatë pandemisë COVID-19.
“Këto gjetje janë një hap i rëndësishëm drejt kuptimit të tendencave të miopisë me kalimin e kohës”, thuhet në raport, “veçanërisht në popullatat që përjetojnë tranzicione të shpejta në miopi dhe rritje të konsiderueshme gjatë periudhës së veçantë të pandemisë COVID-19”.
Megjithëse gjenetika mund të luajë një rol në zhvillimin e miopisë, ajo zakonisht shkaktohet edhe nga ndikimet mjedisore si tendosja e muskujve. Miopia fillon në fëmijërinë e hershme dhe përkeqësohet me kalimin e moshës. Studimi, i cili analizoi studimet e më shumë se 5 milionë fëmijëve nga 50 vende në të gjashtë kontinentet, zbuloi se rreth një e treta e fëmijëve dhe adoleshentëve në grupe të ndryshme demografike kanë vështirësi të shohin gjërat në distancë.
Miopia pritet të kalojë 740 milionë raste deri në vitin 2050. Miopia ka qenë në rritje prej vitesh, duke u rritur nga 24% në 36% të fëmijëve në tre dekadat e fundit. Ky numër pritet të rritet me 9% në 25 vitet e ardhshme.
Qendrat Amerikane për Kontrollin dhe Parandalimin e Sëmundjeve këshillojnë prindërit që të kufizojnë kohën para ekranit të fëmijëve dhe t’i inkurajojnë ata të luajnë jashtë. “Shumë fëmijë shpenzojnë orë të tëra çdo ditë duke bërë aktivitete të shikimit të afërt. Dalja në natyrë i lejon ata të shikojnë objekte të largëta. Kjo i lejon sytë e tyre të shërohen nga tendosja dhe lodhja,” thotë agjencia. “Të luajturit jashtë i ndihmon fëmijët të jenë fizikisht aktivë dhe të marrin vitaminën D“.
Vendet me numrin më të madh të rasteve të miopisë përfshijnë Japoninë (86%), Korenë (74%) dhe Rusinë (46%). Këta shifra lidhen gjithashtu me fillimin e shkollës në një moshë më të re, për rrjedhojë duke i ngarkuar më shumë sytë për t’u fokusuar në detyrat e shkollës.
