Pluhuri nga shkretëtira që përfshin pjesën më të madhe të Afrikës së Veriut, ajo e Saharasë, është duke u përhapur gjithnjë e më shumë në Evropë për shkak të ndryshimeve të fundit në rrymat e erës. Prania e këtij pluhuri u vu re dhe në Shqipëri gjatë ditës së mërkurë, dhe kjo gjë pritet të vazhdojë dhe ditën e enjte.
Sipas një artikulli në revistën e shkencës dhe teknologjisë New Scientist, fenomeni përhapjes së pluhurit nga shkretëtira e Saharasë në Evropë po ndodh më shpesh dhe më intensivisht, madje edhe gjatë muajve më të ftohtë, siç u vu re nga shkencëtarët kohët e fundit.
Një studim i publikuar në gusht 2023 nga një grup studiuesish spanjollë, përfshirë Basart, konfirmon këtë teori. Ata zbuluan se retë gjigante të pluhurit nga Afrika e Veriut arritën në Evropë më shpesh se zakonisht gjatë katër viteve të fundit. Veçanërisht, këto re pluhuri u bënë dukuri të rregullta gjatë dimrit midis 2020 dhe 2022, në vend që të kufizoheshin në stinët e ngrohta.
Pluhuri i Saharasë mund të jetë i dëmshëm për shëndetin tuaj. Grimcat mund të futen përmes frymëmarrjes në mushkëri dhe në qarkullimin e gjakut, duke shkaktuar potencialisht një atak astme apo duke përkeqësuar sëmundje të tjera që lidhen me rrugët e frymëmarrjes si SPOK-u apo infeksionet pulmonare. Pluhuri i Saharasë gjithashtu përkeqëson cilësinë e ajrit dhe rrit nivelet e grimcave në ajër.
Njerëzit që kanë më shumë gjasa të përjetojnë probleme shëndetësore të shkaktuara nga ekspozimi ndaj pluhurit Saharian mund të jenë:
- Fëmijët dhe foshnjat
- Të moshuarit
- Njerëzit që vuajnë nga sëmundje të mushkërive
- Personat me sëmundje kronike kardiopulmonare
Si të mbroheni nga pluhuri Saharian
Kur nivelet e pluhurit Saharian janë të larta, duhet të ndërmerrni hapa për të kufizuar sasinë e ajrit që thithni ndërsa jeni jashtë. Për shembull:
- Kaloni më shumë kohë në ambiente të mbyllura, ku nivelet e ndotjes nga pluhuri Saharian janë zakonisht më të ulëta.
- Mos bëni shumë aktivitete në natyrë (si vrapimi) në mënyrë që të mos thithni pluhurin Saharian gjatë kësaj periudhe.
