Kjo pajisje e re e vendosur mbi një protezë po bën të mundur që një person me dorën e amputuar të ndjejë temperaturën e objekteve përreth tij.
Teknologjia është tashmë duke u avancuar dhe duke rikthyer një gamë të plotë shqisash tek personat e dëmtuar, duke përmirësuar përshtatjen e protezave tek këta njerëz. Një ekip studiuesish në Itali dhe Zvicër e lidhën pajisjen, të quajtur “MiniTouch“, në protezën e vendosur në një burrë 57-vjeçar të quajtur Fabrizio, i cili ka një amputim mbi kyçin e dorës.
Nga testimet u mësua se burri mund të identifikonte me saktësi të përsosur shishet e lëngjeve të ftohta, në temperaturë ambienti dhe të nxehta; si dhe të bënte dallimin midis plastikës, qelqit dhe bakrit apo të rendiste blloqet e çelikut sipas temperaturës me rreth 75% saktësi, raportojnë studiuesit më 9 shkurt në Med.
“Është e rëndësishme që të përfshihen këto teknologji në një mënyrë që përdoruesit e protezave të mund të përdorin atë në të vërtetë për të kryer detyra funksionale,” thotë neuroinxhinieri Luke Osborn i cili nuk ishte i përfshirë në studim. “Futja e modaliteteve të reja të reagimit ndijor mund të ndihmojë për t’u dhënë përdoruesve më shumë funksionalitet që nuk ishin në gjendje të arrinin më parë.”
Pajisja përmirësoi gjithashtu aftësinë e Fabrizios për të treguar nëse ai po prekte një krah artificial apo njerëzor. Saktësia e tij ishte 80% me pajisjen e ndezur, krahasuar me 60% me atë të fikur.
“Sigurisht informacioni nuk është aq i mirë sa ai që merret nga dora normale, ndoshta sepse ne nuk po japim [informacione rreth] teksturave të lëkurës,” thotë neuroinxhinieri Solaiman Shokur i EPFL. Aktualisht pajisja përdor vetëm një sensor në fund të gishtit tregues, por ekipi planifikon të shtojë çifte sensor-stimulator për të krijuar vende më të ndjeshme ndaj temperaturës në protezë. Ata po planifikojnë gjithashtu të zhvillojnë një protezë që kombinon aftësinë për të ndjerë prekjen si dhe temperaturën.
