Këtë verë, shumë vende në Kinë kanë përjetuar temperatura shumë të larta. Në korrik, temperatura mesatare ishte 23.2 gradë Celsius, më e larta që nga viti 1961, sipas të dhënave nga Administrata Meteorologjike e Kinës. Para mesit të gushtit priten edhe dy valë të tjera nxehtësie në vend.
Për të përballuar temperaturat e larta, përveç mbrojtjes së grupeve kryesore të popullsisë, ekspertët theksuan se nevojiten më shumë përgatitje për t’iu përshtatur ndryshimeve klimatike në fusha të tilla si planifikimi urban dhe dizajni arkitektonik. I njohur si një nga qytetet më të nxehtë në Kinën jugperëndimore, Chongqing është shtëpia e shumë ndërtesave të cilat kanë adoptuar teknologji të tilla si shfrytëzimi i hijes, ajrimi dhe shpërndarja e nxehtësisë.
Për shembull, një ndërtesë e mbuluar me 10,000 metra katrorë xham inteligjent mund t’i përgjigjet sinjaleve termike. Kur temperatura e ajrit arrin më shumë se 35 gradë Celsius, xhami automatikisht do të bëhet i errët, duke parandaluar që rrezet e diellit dhe nxehtësia të hyjnë në ndërtesë, duke vepruar si një perde.
Zhong Xianqiang, udhëheqës i projekteve të ndërtimit në zonën e portit të lidhur Chongqing tregoi se xhami inteligjent ka një lloj nanoxheli të përbërë nga polimerë, molekulat e të cilit shpërndahen në mënyrë të barabartë në temperaturë të ulët, duke e bërë xhamin transparent dhe duke lënë dritën e diellit të kalojë. “Kur temperatura rritet, molekulat formojnë grupime, të cilat mund pengojnë kalimin e rrezeve të diellit. Duke e kombinuar këtë material me dy copa xhami, krijohet xhami inteligjent që mund të bllokojë nxehtësinë nga jashtë“, tha Zhong.
Një tjetër mundësi për ta bërë shtëpinë sa më të freskët është mbjellja e pemëve. Bimët e dendura formojnë mikroklimën e tyre, duke ulur temperaturën e sipërfaqes së ndërtesës.
Chen Hangyi, projektuesi kryesor i Shtëpisë Chongqing, tha se nuk duhet të harrojmë dhe ventilimin e ndërtesës. Kalimi i ajrit në formë L nga këndi veriperëndimor i ndërtesës në këndin verilindor e bën dhomën më të freskët, duke përfituar nga era nga një kodër aty pranë. “Vlerësohet se ndërtesa mund të kursejë 40 për qind deri në 50 për qind më shumë energji për metër katror sesa ndërtesa mesatare energy-saving me sistemin e saj të ajrimit dhe sistemin e riciklimit të ujit të shiut,” tha Chen.
