Semaglutide (i reklamuar si Ozempic apo Wegovy) është një medikament antidiabetik që gjatë kohëve të fundit ka bërë bujë pasi njerëzit po e përdorin për të rënë në peshë, me persona të famshëm si Elon Musk dhe influencues që tregojnë efektet e tij.
Ky medikament është tashmë kaq i kërkuar sa po shkakton një mungesë në treg, duke shkaktuar shqetësime për pacientët me diabet të tipit 2, të cilët mbështeten në Ozempic për kontrollin e sheqerit në gjak. Semaglutide imiton një hormon natyral për të rregulluar oreksin dhe sheqerin në gjak. Ky medikament, i administruar me injeksion, i ndihmon njerëzit të ndihen të ngopur për më gjatë, ndihmon në rregullimin e oreksit dhe redukton urinë dhe dëshirat. Megjithatë duhet me patjetër të përmendim rreziqet që vijnë me përdorimin e këtyre medikamenteve.
Rreziqet dhe efektet anësore
- Efektet anësore të zakonshme përfshijnë probleme gastrointestinale si nauze, kapsllëk dhe diarre.
- Efektet anësore të rralla mund të përfshijnë pankreatitin dhe sëmundjen e fshikëzës së tëmthit. Janë raportuar efekte anësore ekstreme si të vjella dhe gastropareza (zbrazja e vonuar e stomakut).
- Efektet afatgjata: Efektet afatgjata të këtyre barnave nuk janë kuptuar ende plotësisht.
Ndërprerja mund të çojë në rifitim të peshës së humbur nëse nuk bëhen ndryshime në stilin e jetës. Përdorimi i këtyre barnave për qëllime të pa miratuara ose pa recetë, paraqet rreziqe duke përfshirë efekte anësore të panjohura të mundshme.
Është e rëndësishme të përdoret ilaçi nën mbikëqyrjen mjekësore për të shmangur keqpërdorimin dhe efektet anësore. Ekspertët sugjerojnë se ndërsa këto barna mund të jenë efektive, ato nuk janë zëvendësues për ndryshimet në stilin e jetës si dieta dhe ushtrimet. Medikamentet rekomandohen për pacientët që nuk kanë arritur suksesin me metoda të tjera të humbjes së peshës, por ato duhet të jenë pjesë e një qasjeje gjithëpërfshirëse që përfshin rregullimin e stilit të jetesës.
