Xiaomi ka prezantuar një projekt eksperimental të inteligjencës artificiale të quajtur Xiaomi miclaw, i cili synon ta kthejë smartphone-in në një asistent më autonom që mund të kryejë detyra në mënyrë të pavarur brenda aplikacioneve dhe funksioneve të sistemit.
Sistemi është ndërtuar mbi modelin gjuhësor të zhvilluar nga kompania, MiMo large language model. Ndryshe nga asistentët tradicionalë që thjesht përgjigjen me tekst ose informacion, miclaw është projektuar të interpretojë qëllimin e përdoruesit dhe të kryejë veprime konkrete duke përdorur aplikacione dhe mjete të ndryshme në telefon.
Pasi përdoruesi jep leje, AI mund të aksesojë funksione të sistemit dhe aplikacione të palëve të treta për të përmbushur kërkesat. Për shembull, nëse një komandë kërkon hapjen e një aplikacioni, kontrollin e të dhënave të sistemit ose aktivizimin e një funksioni, asistenti vendos vetë hapat e nevojshëm dhe i ekzekuton ato njëra pas tjetrës. Sisteme të ngjashme janë shfaqur edhe në pajisje të HONOR me konceptin e AI Agent.
Në qendër të teknologjisë është një proces që Xiaomi e quan “inference-execution loop”. Fillimisht AI analizon kërkesën e përdoruesit, zgjedh mjetin dhe parametrat e duhur, kryen veprimin dhe më pas vlerëson rezultatin. Ky cikël vazhdon derisa detyra të përfundojë, ndërsa proceset kryhen në mënyrë asinkrone për të mos bllokuar funksionet e tjera të telefonit.
Miclaw përfshin gjithashtu një sistem memorieje që i lejon AI të mësojë nga përdorimi i përsëritur dhe të ruajë kontekstin e detyrave më të gjata. Përveç kësaj, asistenti mund të lidhet me ekosistemin e pajisjeve inteligjente të Xiaomi përmes platformës Mi Home, duke kontrolluar pajisje smart home nëse përdoruesi e autorizon këtë. Kompania planifikon ta hapë platformën edhe për zhvilluesit.
