Një rritje çmimi për serinë iPhone 18 duket gjithnjë e më e pashmangshme, por sipas një thashethemi të ri, Apple po shqyrton një strategji alternative për të zbutur ndikimin te konsumatorët. Informacioni vjen nga tipster-i korean yeux1122, i cili citon analiza nga institucione të mëdha financiare si Citigroup, Bank of America dhe J.P. Morgan.
Sipas këtyre burimeve, arsyeja kryesore e shtrenjtimit lidhet me atë që quhet “RAMageddon”, rritja e fortë e çmimeve të moduleve të memories RAM, e nxitur kryesisht nga kërkesa masive e qendrave të të dhënave për inteligjencën artificiale. Edhe pse Apple zakonisht siguron marrëveshjet më të favorshme me furnitorët, kjo valë shtrenjtimi pritet të ndikojë drejtpërdrejt në koston e prodhimit të iPhone 18, duke e bërë serinë më të shtrenjtë se iPhone 17.
Teorikisht, Apple mund të zgjedhë të përthithë këtë kosto shtesë duke ulur fitimet e saj, por kjo konsiderohet pak e mundshme. Në vend të kësaj, kompania mund të aplikojë një kompromis strategjik: të mbajë të pandryshuar çmimin e modeleve më të shitura, ndërsa variantet e tjera të shtrenjtohen. Edhe ky veprim “dashamirës”, sipas analistëve, vështirë se do të bindë përdoruesit që tashmë kanë vendosur të mos përditësojnë telefonin këtë vit.
Për blerësit që ende planifikojnë një blerje, këshilla më e arsyeshme duket të jetë zgjedhja e variantit 256GB, pavarësisht preferencave të mëparshme për më shumë hapësirë. Alternativat si ruajtja në cloud ose përdorimi i një SSD-je të jashtme mund të ofrojnë fleksibilitet me kosto më të ulët.
Sa i përket afateve, iPhone 18 Pro dhe Pro Max pritet të prezantohen në shtator, së bashku me iPhone Fold. Ndërkohë, modeli bazë i iPhone 18 dhe iPhone Air 2 mund të shtyhen për fillimin e vitit 2027, si pjesë e një strategjie të re të lançimit të ndarë nga Apple.
