Në Forumin Ekonomik Botëror në Davos, dje Presidentja e Komisionit Evropian, Ursula von der Leyen, bëri një nga njoftimet më të pritura të vitit për komunitetin e startup-eve dhe biznesit evropian: krijimin e EU-INC, një entitet juridik evropian i ri, i njohur si “regjimi i 28-të”, i cili synon të thjeshtojë mënyrën se si kompanitë krijohen, operojnë dhe rriten në Bashkimin Evropian.
Në thelb, EU-INC do të sjellë një formë të vetme ligjore pan-evropiane që do të jetë një alternativë ndaj strukturave të ndryshme kombëtare që ekzistojnë aktualisht në 27 shtetet anëtare të BE-s. Kjo është arsyeja pse projektuesit e quajnë atë “regjimin e 28-të”, si një “shtet të 28-të” juridik që funksionon mbi të gjithë tregun e përbashkët, duke ofruar një set të harmonizuar rregullash për bizneset.
Një nga elementet më të spikatura të këtij propozimi është trajtimi i regjistrimit dhe themelimit të kompanive si proces i shpejtë dhe plotësisht dixhital: sipas planeve të Parlamentit Evropian dhe publikimeve zyrtare, një kompani e re mund të regjistrohet në vetëm 48 orë përmes një portali të unifikuar digjital në nivel BE-s, duke përdorur vetëm një euro kapital minimal të paguar.
President Ursula von der Leyen officially announced the EU–INC today at Davos!
— EU–INC (@euinc_petition) January 20, 2026
A single legal entity for all European founders to grow massive companies in Europe. Online incorporation in 48 hours. No more bureaucratic mess across European borders.
All of you made this happen! pic.twitter.com/l9qQxOGgvJ
Përtej thjeshtësisë së regjistrimit, EU-INC synon të ofrojë edhe dokumentacion investimi të standardizuar, një kornizë të përbashkët për opsionet e aksioneve për punonjësit dhe një regjistër qendror shumëgjuhësh për komunikimin me autoritetet, të gjitha nën ligjin e BE-s. Kjo synon të ulë barrierat administrative që shpesh i ndalojnë kompanitë evropiane të rriten dhe tërheqin kapital global, duke i vendosur ato në një pozicion më konkurrues ndaj rivalëve si Shtetet e Bashkuara ose Kina.
Megjithatë, iniciativa nuk është pa polemika. Disa grupime të punëtorëve dhe studiues të politikave paralajmërojnë se regjimi i ri mund të minojë disa mbrojtje të punës së vendeve anëtare ose të shërbejë si një “shtresë tjetër burokratike” në vend që të zgjidhë fragmentimin ekzistues.
Për momentin, EU-INC dhe 28th regime janë ende në fazë propozimi ligjor dhe duhet të kalojnë negocimet mes Komisionit, Parlamentit Evropian dhe Këshillit të BE-s para se të miratohen si ligj zyrtar, një proces që pritet të zhvillohet përgjatë vitit 2026 dhe të hyjë në fuqi më pas.
Me këtë nismë, Von der Leyen po shtron një vizion të ri për tregun e vetëm evropian, ku start-up-et dhe inovacioni mund të lulëzojnë me më pak pengesa dhe më shumë akses në kapital dhe talent – një betejë strategjike për të forcuar konkurrencën globale të Evropës.
