Samsung ka folur për Galaxy S25 Edge të tij super të hollë që nga CES në janar, dhe tani kompania solli një mori pajisjesh aktuale në Mobile World Congress (MWC) në Barcelonë, të cilat stafi i Geek Room i ndoqi nga afër, por nuk arriti dot t’i prekte, pasi një gjë e tillë ishte e ndaluar.
Ne ende nuk kemi ndonjë specifikim zyrtar dhe nuk e dimë as sa i hollë është, pasi një gjë e tillë pritet të bëhet e ditur muajin e ardhshëm, kur ky produkt të vijë në treg.
Me hollësinë e përfolur prej 5.84 mm, padyshim që ju mund të keni disa dyshime për sa i përket aftësisë së kësaj pajisje për t’i përballuar përplasjeve apo rënieve në tokë. Kjo nuk do të jetë shqetësuese, sipas zëvendëspresidentes së produktit dhe marketingut të Samsung, Annika Bizon.
Ajo pretendon se forma e telefonit nuk sakrifikon qëndrueshmërinë, pa hyrë në ndonjë detaj specifik. “Nuk mund të them shumë, por ajo që do të them është se [Edge] ka një formë të bukur. Dhe unë dua të shtoj dy pika. Njëra është se është absolutisht mahnitëse. Dhe nëse mendoni për teknologjinë që integrohet në atë madhësi të hapësirës, është mjaft mbresëlënëse. Gjëja e dytë që do të them ka të bëjë me qëndrueshmërinë. Me çdo gjë të hollë, qëndrueshmëria [duhet të vijë si pjesë e paketës]. Këto janë dy tiparet [e Edge] që janë emocionuese [për ne]. Epo, e di që qëndrueshmëria nuk është emocionuese – por është vërtet e rëndësishme. Pra, shikoni këtë hapësirë, sepse ka disa gjëra emocionuese që do të vijnë në lidhje me këtë telefon.”
Pra me sa duket S25 Edge do të shoqërohet me disa përmirësime për sa i përket fortësisë dhe qëndrueshmërisë, pasi është përfolur se përdor një pjesë të pasme qeramike. Qeramika është më e fortë se qelqi dhe mund të funksionojë në harmoni me kornizën metalike për të siguruar që S25 Edge të mos dështojë në ‘testet e qëndrueshmërisë’ tashmë tradicionale si ato të kryera nga Zack në JerryRigEverything.
